Valdís Þóra Jónsdóttir, atvinnukylfingur úr Leyni á Akranesi, náði sínum næst besta árangri á tímabiinu á Lacoste Ladies Open í Frakklandi.
Mótaröðin er sú sterkasta hjá atvinnukylfingum í kvennaflokki í Evrópu.
Skorið á mótinu má nálgast hér.
Valdís Þóra lék hringina fjóra á +2 samtals (79-66-70-71). Eins og sjá má gekk ýmislegt á hjá Valdís Þóru á þessum fjórum keppnisdögum.
Hún vann sig sterkt til baka eftir erfiða byrjun á mótinu. Fyrir árangurinn í Frakklandi fékk Valdís Þóra um 600.000 kr. í verðlaunafé.
Sigurvegarinn, Nelly Korda, frá Bandaríkjunum lék á -15 samtals og fékk hún tæplega 7 milljónir kr. í verðlaunafé.
Mótið í Frakklandi er 12. mótið á tímabilinu hjá Valdísi Þóru. Hún var í 78. sæti stigalista LET Evrópumótaraðarinnar fyrir mótið en er nú í 73. sæti.
Hún lék síðast í Skotlandi í ágúst en besti árangur Valdísar Þóru á þessu tímabili er 5. sæti á móti sem fram fór á Nýja-Sjálandi í byrjun mars á þessu ári.
Það fer að líða að lokum keppnistímabilsins á LET Evrópumótaröðinni. Valdís Þóra á eftir að keppa á þremur mótum til viðbótar.
Næsta mót fer fram á Spáni 26.-29. september, næst síðasta mótið fer fram á Indlandi í byrjun október og lokamótið fer fram í lok nóvember á Spáni.
