Korpubikarinn í samvinnu við First Water hefst föstudaginn 29. maí á Korpúlfsstaðavelli hjá Golfklúbbi Reykjavíkur. Mótið er annað mót tímabilsins á GSÍ mótaröðinni og verða leiknar 54 holur á þremur keppnisdögum. 

Smelltu hér fyrir rástíma og stöðuna

Keppendahópurinn er sterkur líkt og önnur ár í þessu flotta móti. Íslandsmótið í golfi verður einnig leikið á Korpúlfsstöðum seinna í sumar.

Í karlaflokki eru 72 keppendur. Þar er meðalforgjöf keppenda +0.7, lægsta forgjöfin er +5.4 og hæsta forgjöfin er 5.1. Í karlaflokki eru 44 keppendur með 0 eða lægra í forgjöf.

Fjórir af fimm efstu kylfingum Reykjanesmótsins eru á meðal keppenda. Þar á meðal eru Aron Snær Júlíusson og Tómas Eiríksson Hjaltested, sem báðir unnu til verðlauna í því móti. Akureyringurinn Veigar Heiðarsson mætir einnig í sitt fyrsta mót á tímabilinu, en hann kemur inn af krafti eftir að hafa leikið í bandaríska háskólagolfinu í vetur.

Í kvennaflokki eru 18 keppendur. Meðalforgjöfin er 1, lægsta forgjöfin er +4 en sú hæsta er 6.1.

Perla Sól Sigurbrandsdóttir stefnir á sinn annan sigur í röð eftir flotta frammistöðu fyrr í maí. Atvinnukylfingurinn Ragnhildur Kristinsdóttir er einnig á meðal keppenda, en hún endaði önnur í LET Access móti í síðustu viku.

Keppendur eru alls 90, og koma þeir frá 15 klúbbum víðsvegar af landinu.

GR á þar flesta kylfinga eða tuttugu og sjö alls. GKG kemur þar á eftir með sextán keppendur, og GM sendir fjórtán. Sjö klúbbar eru með keppendur í bæði kvenna- og karlaflokki.