Golf 14 og Unglingamótaröð GSÍ heimsækja Jaðarsvöll á Akureyri um helgina, þar sem ungir og efnilegir kylfingar leika við frábærar aðstæður. Um 140 kylfingar mæta til leiks í mótin tvö, og verður því mikið líf á svæðinu.
Mót Unglingamótaraðarinnar hófst í dag, 17. júlí. Veðrið lék við keppendur frá fyrsta ráshópi til þess síðasta, og sáust góðir taktar um allan Jaðarsvöll.
Hér má sjá rástíma og stöðu í Unglingamótaröðinni
Í drengjaflokki var það Kristján Karl Guðjónsson, GM, sem lék best á fyrsta hring. Hann kom í hús á 68 höggum, þremur undir pari vallarins. Kristján fékk fjóra fugla og einn skolla á hringnum, en sagðist eiga mikið inni þegar Golfsambandið náði á honum á fimmtándu holu.
Þrír kylfingar eru tveimur höggum á eftir Kristjáni: Ágúst Már Þorvaldsson, Birgir Steinn Ottósson og Gunnar Þór Heimisson.
Tinna Alexía Harðardóttir, GK, leiðir stúlknaflokkinn eftir hring upp á 74 högg í dag. Stutt er á milli efstu kylfinga, en María Högnadóttir, GSE, er einungis höggi á eftir Tinnu eftir góða spilamennsku.
Það stefnir allt í annan frábæran dag á Jaðarsvelli á morgun. Sjáumst þar.
