Tjaldur er á meðal stærstu vaðfugla, en hann kann einnig vel við sig í glompunum á Hólmsvelli í Leiru. Það fór ekkert á milli mála hjá þeim sem léku 7. braut á Egils Gull mótinu í maí s.l. að tjaldurinn var lítt hrifinn af því að fá kylfinga of nálægt hreiðrinu í brautarglompunni.

Arnór Ingi Finnbjörnsson sló upphafshöggið í brautarglompuna sem var merkt sem grund í aðgerð vegna hreiðurgerðar tjaldsins. Arnór lét boltann falla rétt við glompuna en tjaldurinn lét vita vel af sér og varði hreiðurstaðinn með því að fljúga ítrekað í áttina að Arnóri Inga. Egill Ragnar Gunnarsson úr GKG og Guðmundur Rúnar Hallgrímsson úr GS aðstoðuðu Arnór Inga til þess að hann gæti fengið frið til þess að slá höggið – og þeim var ekki alveg sama um árásir tjaldsins eins og sjá má á þessum myndum.

Á Íslandi eru tjaldar algengir varpfuglar á láglendi í öllum landshlutum, einkum í grennd við sjó en sums staðar leita þeir nokkuð inn til lands. Sandfjörur og malarfjörur, grandar og fjörukambar eru helstu varpstaðir tjalda.

Yfirleitt raða fuglarnir smásteinum eða skeljabrotum í skálina en einnig smákvistum eða þangklóm. Egg í hreiðri eru venjulega þrjú, en stundum fjögur eins og er algengast hjá vaðfuglum.

Tjaldseggin eru brún eða gráleit með svörtum rákum og því vel til þess fallin að falla inn í umhverfi sitt. Þau eru mun kringlóttari og snubbóttari í mjórri endann en önnur vaðfuglsegg, sem jafnan eru perulaga. Eggin klekjast út á tuttugu og einum til tuttugu og sjö dögum og skiptast kvenfuglinn og karlfuglinn á að liggja á eggjunum.