Daníel Ísak Steinarsson, Hlynur Bergsson og Dagbjartur Sigurbrandsson eru allir á meðal efstu kylfinga Sand Valley Masters mótsins sem lýkur í dag. Mótið, sem fer fram á Sand Valley golfsvæðinu í Póllandi, er hluti af Nordic Golf League mótaröðinni sem er sú þriðja sterkasta í Evrópu.

Stór hópur íslenskra afrekskylfinga var á meðal keppenda mótsins en þremeningarnir voru þeir einu sem náðu í gegnum niðurskurð.

Daníel og Hlynur eru jafnir í sjötta sæti mótsins á fjórum höggum undir pari. Daníel lék hringina tvo á 67-69 höggum og hefur einungis fengið tvo skolla í mótinu. Að fyrsta hring loknum var Daníel jafn í 10. sætinu en kom sér upp stöðutöfluna með öðrum góðum hring í gær.

Hlynur hefur leikið báða sína hringi á 68 höggum. Örfáir kylfingar hafa sótt fleiri fugla en Hlynur í mótinu, en GKG-ingurinn er með níu slíka á fyrstu 36 holunum.

Daníel og Hlynur leika lokahringinn í sama hollinu ásamt Svíanum Albin Tidén. Albin er efsti kylfingur stigalistans og hefur unnið tvö af fyrstu sex mótum tímabilsins.

Dagbjartur er jafn í 15. sæti mótsins á tveimur höggum undir pari. Hann hefur leikið báða hringina á 69 höggum og fengið á þeim sjö fugla og fimm skolla.

Hér má skoða stöðu mótsins

Hér má sjá skor allra íslensku kylfinganna (að tveimur hringjum loknum)

Efstu fimm kylfingar stigalistans í lok tímabils vinna sér inn fullan þátttökurétt á HotelPlanner Tour mótaröðinni, sem er sú næststerkasta í Evrópu. Einnig er hægt að vinna sér inn þátttökurétt með því að vinna þrjú mót á sama tímabilinu. Haraldur Franklín Magnús leikur á HotelPlanner Tour, en sú mótaröð hefst aftur í maí.