Helga Signý Pálsdóttir og Perla Sól Sigurbrandsdóttir kepptu báðar á áhugamannamóti R&A fyrir stúlkur yngri en 16 ára (Girls U16 Amateur Championship) sem fram fór á Englandi dagana 22.-24. apríl 2022.
Mótið var sett á laggirnar árið 2018 og að þessu sinni var keppt á Enville golfsvæðinu skammt frá Birmingham á Englandi.
Alls tóku 90 keppendur þátt og komu þeir frá fjölmörgum löndum víðsvegar úr heiminum.
Keppnisfyrirkomulagið var 54 holu höggleikur en R&A setti mótið á laggirnar til þess að búa til verkefni fyrir efnilegustu kylfingana í stúlknaflokki yngri en 16 ára.
Perla Sól og Helga Signý eru báðar úr Golfklúbbi Reykjavíkur og hafa verið í fremstu röð í sínum aldursflokki undanfarin misseri.
Perla Sól var á meðal 10 efstu alla þrjá keppnishringina en hún endaði í 6. sæti á +11 samtals (77-75-75) 227 högg.
Gracel Crawford frá Skotlandi stóð uppi sem sigurvegari á +4 samtals, 220 högg.
Helga Signý endaði í 77. sæti á +45 (87-88-84) 259 högg.
![Helga Signý - Perla Sól .jpeg - Golfsamband Íslands](https://www.golf.is/wp-content/uploads/2022/04/Helga-Signý-Perla-Sól-1024x576.jpg)