Dagbjartur Sigurbrandsson lék frábært golf á fyrsta hring Royal Unibrew Championship mótsins í dag. Íslandsmeistarinn lék hringinn á fimm höggum undir pari og er jafn í öðru sæti mótsins, sem er hluti af Nordic Golf League mótaröðinni. Hlynur Bergsson og Sigurður Arnar Garðarsson eru einnig á meðal keppenda, en þeir komu báðir inn á þremur höggum undir pari. Saman eru þeir jafnir í tíunda sætinu eftir góða frammistöðu í dag.
Dagbjartur hóf hringinn af krafti og fékk tvo fugla á fyrstu fimm holunum. Að sextán holum loknum var Dagbjartur tvo undir pari. Síðustu tvær holur vallarins lék hann á þremur undir pari, en GR-ingurinn fylgdi frábærum erni eftir með fugli á lokaholunni. Dagbjartur situr höggi á eftir Norðmanninum Sebastian Eidsæther Syr, sem lék hring dagsins á sex höggum undir pari.
Sigurður og Hlynur eru einnig í toppbaráttunni eftir flotta hringi í dag. Sigurður fékk fimm fugla og tvo skolla, en Hlynur fékk fjóra fugla og einn skolla. Það verður gaman að fylgjast með okkar kylfingum í mótinu næstu daga, en þeir hafa allir leikið vel á mótaröðinni á árinu.
Dagbjartur er í 31. sæti stigalistans, en hann hefur leikið í níu mótum. Hlynur situr rétt á eftir Íslandsmeistaranum, í 37. sætinu, eftir átta mót. Sigurður Arnar er í 47. sætinu en hefur þó einungis tekið þátt í þremur mótum. Öll voru þau á sama svæðinu í Póllandi í apríl, og varð Sigurður á meðal tíu efstu í tvígang.
Efstu fimm kylfingar stigalistans í lok tímabils vinna sér inn fullan þátttökurétt á HotelPlanner Tour mótaröðinni, sem er sú næststerkasta í Evrópu.
