Kate Stillwell, vallarstjóri Golfklúbbs Kópavogs og Garðabæjar, fór í ítarlegt viðtal við BIGGA, bresku samtökin fyrir fagfólk í umhirðu golfvalla, þar sem hún ræðir starf sitt hjá GKG, íslenskar aðstæður og sérstöðu golfvallareksturs hér á landi.
Hér má lesa viðtalið í heild sinni
Kate hefur víðtæka reynslu úr golfvallarumhirðu, meðal annars af undirbúningi stórmóta, framkvæmdaverkefnum og stjórnunarstörfum. Hún segir þó starfið á Íslandi hafa fært sér áskoranir sem hún hafi ekki áður kynnst á ferlinum.
Í viðtalinu fer Kate meðal annars yfir þær sérstöku aðstæður sem íslenskir vellir búa við. Hún nefnir frostlyftingu sem eitt það óvenjulegasta sem hún hafi upplifað, en jarðvegurinn geti lyfst verulega yfir veturinn og því sé mikilvægt að fara rétt af stað á vorin. Þá þurfi að huga sérstaklega að því hvenær farið er inn á flatir og teiga, enda geti hjólför snemma vors setið lengi í yfirborðinu.
Kate ræðir einnig notkun svarts sands, sem er algengari hér á landi en víða annars staðar. Hann sé meðal annars notaður til að hita flatirnar fyrr á vorin og koma grasvexti af stað. Hún segir íslenskar aðstæður krefjast þess að fólk hugsi fram í tímann, hafi fjölbreytt verkfæri tiltæk og sé tilbúið að bregðast hratt við breytilegu veðurfari.
Í viðtalinu kemur einnig fram að íslenskt golf sé afar virkt og að golfarar hér á landi hafi mikla ástríðu fyrir íþróttinni. Á GKG sé leikálagið mikið yfir sumarið, ekki síst vegna langra daga og mikillar þátttöku félagsmanna. Kate nefnir að á Leirdalsvelli, 18 holu velli GKG, séu leiknir um 34.000 hringir á fimm mánuðum og á 9 holu vellinum, Mýrinni, um 36.000 hringir. Þá geti kylfingar leikið langt fram eftir kvöldi og jafnvel allan sólarhringinn þegar bjartast er.
GKG hefur jafnframt mikla sérstöðu þegar kemur að barna- og unglingastarfi. Í viðtalinu kemur fram að um 900 börn æfi hjá félaginu, bæði innandyra í golfhermum yfir vetrartímann og utandyra á sumrin. Kate segir þetta skapa einstakt líf í klúbbhúsinu allt árið um kring.
Hún hrósar einnig samstöðu vallarstarfsmanna á Íslandi og segir samfélagið innan greinarinnar vera mjög þétt. Vellir hjálpist að með tæki og búnað þegar á þarf að halda og hún lýsir íslenska vallarstarfinu sem einni stórri fjölskyldu þar sem allir séu tilbúnir að rétta hjálparhönd.
Kate talar jafnframt hlýlega um Guðmund Árna Gunnarsson, fyrrverandi vallarstjóra GKG, sem starfaði hjá félaginu í 25 ár og hefur áratuga reynslu af íslenskum golfvöllum. Hún segir hann hafa reynst sér mikilvægur stuðningur þegar hún hóf störf hjá GKG, bæði með ráðleggingum og þekkingu á staðbundnum aðstæðum.
Í viðtalinu kemur einnig fram að GKG sé með GEO-vottun og að félagið horfi mikið til sjálfbærni í þróun vallarins. Meðal verkefna sem unnið sé að eru svokölluð lífríkisgöng á milli hola, auk þess sem félagið undirbýr nýja aðstöðu fyrir vallarstarfsmenn og búnað. Þar verður meðal annars gert ráð fyrir auknu rými fyrir rafknúinn búnað og vélmenni, sem verða sífellt stærri hluti af framtíð vallarumhirðu.
Viðtalið við Kate gefur áhugaverða innsýn í það mikla og oft ósýnilega starf sem fer fram á íslenskum golfvöllum. Þar kemur skýrt fram að vallarumhirða á Íslandi krefst bæði sérþekkingar, þolinmæði og mikillar aðlögunarhæfni, en einnig að íslenskt golf nýtur góðs af sterku samfélagi fagfólks sem vinnur saman að því að bæta aðstæður kylfinga um allt land.
