Fyrst var keppt um Íslandsmeistaratitilinn í kvennaflokki árið 1967. Mótið í ár er það 58. í röðinni í kvennaflokki. Alls eru 25 nöfn grafin á verðlaunagripinn í kvennaflokki, 14 kylfingar hafa sigrað oftar en einu sinni. Kylfingar úr GR hafa oftast sigrað eða 23 sinnum, GK er með 13 titla, og GS er með 11 titla.

Í kvennaflokki eru allir bestu kylfingar landsins með. Þar má nefna, Guðrúnu Brá Björgvinsdóttur, GK, sem er þrefaldur Íslandsmeistari og atvinnukylfingur á næst sterkustu mótaröð Evrópu, LET Access. Huldu Clöru Gestsdóttur, GKG, Íslandsmeistari 2021, Perlu Sól Sigurbrandsdóttur, GR, sem sigraði á Íslandsmótinu 2022i. Ragnhildi Kristinsdóttur, GR, sem er atvinnukylfingur á næst sterkustu atvinnumótaröð Evrópu, en Ragnhildur hefur titil að verja á þessu móti. Andreu Bergsdóttur, sem er í íslenska landsliðinu og er efst íslenskra kvenna á heimslista áhugakylfinga.

Meðalaldur keppenda í kvennaflokki er 21,4, ár og meðalforgjöf í kvennaflokki er 1.8. Elsti keppandinn í kvennaflokki er Þórdís Geirsdóttir, sem er 59 ára, en hún varð Íslandsmeistari árið 1987. Sara María Guðmundsdóttir er sú yngsta í kvennaflokknum en hún er fædd í apríl 2010 og er því 14 ára.

Fimm keppendur í kvennaflokki á Íslandsmótinu í golfi hafa fagnað þessum titli áður. Guðrún Brá Björgvinsdóttir, GK, (2018, 2019, 2020), Hulda Clara Gestsdóttir, GKG (2021), Perla Sól Sigurbrandsdóttir, GR (2022), Ragnhildur Kristinsdóttir (2023), Þórdís Geirsdóttir, GK (1987).