Íslenski atvinnukylfingurinn Sigurður Arnar Garðarsson, GKG, lék ótrúlegt golf á öðrum hring Sand Valley Spring Series Finals mótsins í Póllandi í dag. Sigurður lauk leik á tíu höggum undir pari eftir frábæra spilamennsku.
Sigurður byrjaði hringinn á tíundu holu Sand Valley Golf Resort og fór af stað af krafti, en hann fékk þrjá fugla og örn á fyrstu sex holum hringsins. Á sautjándu holunni bætti hann einum fugli við og lék seinni níu holurnar því á 30 höggum, sex undir pari.
Eftir tvö pör á fyrstu tveimur holum fyrri níu fóru fuglarnir að hrannast inn á ný. Þrír fuglar í röð duttu á holum þrjú, fjögur og fimm, og Sigurður kominn níu undir par eftir fjórtán holur. Fugl á áttundu holunni kom Sigurði tíu undir og par á síðustu holu dagsins fullkomnaði þennan magnaða hring.
Með árangrinum flýgur Sigurður upp stöðutöfluna. Fyrir hringinn var hann jafn í 30. sæti, en hann átti flottan hring í gær upp á þrjá undir par. Sigurður er jafn í fjórða sæti mótsins þegar þetta er skrifað.
Stór hópur íslenskra afrekskylfinga eru einnig á meðal keppenda mótsins, sem er hluti af Nordic Golf League mótaröðinni sem er sú þriðja sterkasta í Evrópu. Íslensku kylfingarnir eru:
- Aron Snær Júlíusson, GKG
- Dagbjartur Sigurbrandsson, GR
- Daníel Ísak Steinarsson, GK
- Hlynur Bergsson, GKG
- Logi Sigurðsson, GS
- Sigurður Arnar Garðarsson, GKG
- Skúli Gunnar Ágústsson, GKG
Aron Snær lék fyrsta hringinn á 71 höggi, en Dagbjartur, Skúli og Logi léku hann allir á 72 höggum. Hlynur lék á 74 höggum og Daníel Ísak kom í hús á 79 höggum.
