Bjarki Pétursson, GKG, Haraldur Franklín Magnús GR, Andri Þór Björnsson, GR og Hákon Örn Magnússon hófu leik á þriðjudaginn á 1. stigi úrtökumótsins fyrir DP World Tour atvinnumótaröðina.
Bjarki, Haraldur og Andri komust í gegnum niðurskurðinn að loknum 36 holum en Hákon Örn féll úr leik.
Haraldur Franklín lék samtals á -11 á fjórum keppnishringjum – en hann lék lokahringinn á 68 höggum eða -4 og fór upp um 9 sæti. Hann endaði í 22. sæti og er öruggur áfram á 2. stig úrtökumótsins.
Andri Þór lék á -8 samtals og endaði í 37. sæti og Bjarki lék á -5 samtals og endaði í 42. sæti.
Alls er keppt á níu keppnisstöðum á 1. stigi úrtökumótsins haustið 2023 og alls eru sjö íslenskir keppendur sem taka þátt að þessu sinni á 1. stigi úrtökumótsins.
Stigin á úrtökumótunum fyrir DP World Tour eru alls þrjú. Axel Bóasson, GK, fer beint inn á 2. stig úrtökumótsins og Guðmundur Ágúst Kristjánsson, GKG, fer beint inn í lokaúrtökumótið ef hann nær ekki að halda keppnisrétti sínum á DP World Tour í lok tímabilsins.
Aron Snær Júlíusson, Sigurður Arnar Garðarsson og Hlynur Bergsson, sem eru allir félagsmenn í Golfklúbbi Kópavogs og Garðabæjar, kepptu nýverið á Millennium golfvellinum rétt við borgina Brussel í Belgíu en komust ekki áfram.
Það má gera ráð fyrir að um 20 efstu af hverjum velli fyrir sig komist áfram á 2. stig úrtökumótsins.
Smelltu hér fyrir rástíma, stöðu og úrslit.
Axel Bóasson, GK, fer beint inn á 2. stig úrtökumótins en þar verður keppt á fjórum völlum á Spáni dagana 2.-5. nóvember.
Lokaúrtökumótið fer fram á Infinitum völlunum við Tarragona á Spáni dagana 10.-15. nóvember. Guðmundur Ágúst Kristjánsson, GKG, fer þar inn ef honum tekst ekki að halda keppnisrétti sínum á þessu tímabili á DP World Tour.
