Íslensku landsliðskonurnar Andrea Bergsdóttir og Perla Sól Sigurbrandsdóttir eru á meðal keppenda á Evrópumóti einstaklinga sem fram fer í Svíþjóð dagana 26.-29. júlí 2023.
Alls eru 144 keppendur sem taka þátt og er keppendahópurinn skipaður bestu leikmönnum Evrópu í flokki áhugamanna.
Keppnisfyrirkomulagið er höggleikur og verða leiknar 72 holur, 18 holur á dag á fjórum keppnisdögum. Niðurskurður er eftir þriðja keppnisdaginn þar sem að 60 efstu keppendurnir komast áfram á lokahringinn.
Mótið fer fram á Tegelberga vellinum á Skáni en völlurinn er rétt við borgina Trelleborg.
Smelltu hér fyrir rástíma, stöðu og úrslit:
Andrea Bergsdóttir hefur leikið fyrir stúlkna – og kvennalandslið Íslands á undanförnum árum. Hún hefur búið í Svíþjóð frá barnsaldri og er í Hills golfklúbbnum. Hún leikur með háskólaliði í Bandaríkjunum.
Perla Sól er ríkjandi Evrópumeistari unglinga 16 ára og yngri, hún fagnaði Íslandsmeistaratitlinum í holukeppni 2023 um s.l. helgi á Hamarsvelli í Borgarnesi og hún er ríkjandi Íslandsmeistari í golfi.
Andrea og Perla Sól léku æfingahring með ríkjandi Evrópumeistara einstaklinga í dag. Savannah De Bock frá Belgíu sigraði í fyrra.
