Íslenska 50+ kvennalandsliðið í golfi hafnaði í 16. sæti á Evrópumóti landsliða sem lauk á BlackSeaRama vellinum í Búlgaríu í gær.
Ísland mætti Skotlandi í viðureigninni um 15. sæti mótsins á lokadeginum. Skoska liðið hafði betur, 3.5-1.5. Bæði Ísland og Skotland leika í 2. deild mótsins á næsta ári.
Ísland hóf holukeppnina með 3.5-1.5 tapi gegn Ítalíu. Næst beið liðið lægri hlut fyrir Portúgal, aftur 3.5-1.5.
Í höggleikshluta mótsins lék Ísland á 845 höggum og varð í 16. sæti. Þórdís Geirsdóttir náði besta samanlagða skori íslensku keppendanna, 161 höggi eða 17 höggum yfir pari.
Lið Íslands á mótinu skipuðu Þórdís Geirsdóttir, Steinunn Sæmundsdóttir, Helga Þorvaldsdóttir, Ragnheiður Sigurðardóttir, Sigríður Kristinsdóttir og Lilja Guðríður Karlsdóttir.
