Undankeppni Íslandsmótsins í golfi fór fram á Korpúlfsstaðavelli fimmtudaginn 30. júlí. Keppt var um tíu síðustu sætin í karlaflokki Íslandsmótsins, sem fer fram dagana 6.-9. ágúst.
Gunnar Smári Þorsteinsson úr Golfklúbbi Reykjavíkur lék best allra í undankeppninni. Hann lauk leik á 71 höggi, eða pari vallarins. Gunnar Smári lék stöðugt golf, fékk einn fugl, einn skolla og paraði 16 holur.
Jónas Guðmarsson, einnig úr GR, varð annar á 73 höggum, tveimur yfir pari. Fannar Ingi Steingrímsson úr Golfklúbbi Hveragerðis og Maron Björgvinsson úr Golfklúbbi Akureyrar léku báðir á 74 höggum, þremur yfir pari.
Mikil spenna var í baráttunni um tíunda og síðasta sætið. Fimm kylfingar luku leik á 77 höggum, sex yfir pari, og þurfti því að grípa til bráðabana. Guðmundur Freyr Sigurðsson úr Golfklúbbi Suðurnesja hafði betur í bráðabananum og tryggði sér síðasta lausa sætið á Íslandsmótinu.
Þeir sem komust áfram eru:
- Gunnar Smári Þorsteinsson, Golfklúbbur Reykjavíkur
- Jónas Guðmarsson, Golfklúbbur Reykjavíkur
- Fannar Ingi Steingrímsson, Golfklúbbur Hveragerðis
- Maron Björgvinsson, Golfklúbbur Akureyrar
- Gunnar Þórður Jónasson, Golfklúbbur Reykjavíkur
- Birkir Þór Baldursson, Golfklúbburinn Leynir
- Óli Björn Bjarkason, Golfklúbbur Kópavogs og Garðabæjar
- Kristinn Sölvi Sigurgeirsson, Golfklúbbur Selfoss
- Arnar Freyr Viðarsson, Golfklúbbur Akureyrar
- Guðmundur Freyr Sigurðsson, Golfklúbbur Suðurnesja
Alls voru 33 kylfingar skráðir til leiks í undankeppnina, sem var haldin í fjórða sinn. Hér má sjá öll úrslit undankeppninnar.
