Ólafía Þórunn Kristinsdóttir, atvinnukylfingur úr GR, hefur ákveðið að taka þátt á Íslandsmótinu í golfi – 2019 á Mótaröð þeirra bestu.
Ólafía Þórunn hefur verið í fremstu röð íslenskra atvinnukylfinga undanfarin ár. Hún hefur náð hæst allra íslenskra kylfinga á heimslista atvinnukylfinga, leikið á flestum risamótum og er eini kylfingurinn sem hefur náð að tryggja sér keppnisrétt á LPGA mótaröðinni í Bandaríkjunum.
Þetta kemur fram í tilkynningu frá Ólafíu og KPMG á Íslandi.
Tilkynningin er hér fyrir neðan:
„Það er okkur sönn ánægja að tilkynna að Ólafía Þórunn Kristinsdóttir, þrefaldur Íslandsmeistari í golfi, hefur ákveðið taka þátt í Íslandsmótinu í höggleik sem fram fer á Grafarholtsvelli 8.-11. ágúst.
Það verður nóg að gera hjá Ólafíu Þórunni næstu vikurnar en á mánudag tekur hún þátt í Einvíginu á Nesinu og helgina eftir Íslandsmótið er mót á Symetra mótaröðinni og á mánudeginum í kjölfarið tekur hún þátt í úrtökumóti fyrir LPGA mót sem fer fram helgina þar á eftir.
„Það er mjög óvænt að ég taki þátt í Íslandsmótinu. Ég var að spila Grafarholtið um daginn og fannst það svo rosalega gaman. Mig kitlaði í fingurna að vera með í mótinu, þannig að ég hugsaði þetta í nokkra daga og í framhaldinu ákvað ég að breyta plönunum mínum aðeins og láta vaða. Það verður gaman að spila aftur á Íslandi, sérstaklega í Grafarholtinu þar sem ég ólst upp.“
Íslandsmótið í Grafarholti á 85 ára afmæli klúbbsins verður án efa glæsilegt í alla staði og óskum við Ólafíu Þórunni sem og öðrum kylfingum og sem að mótinu standa góðs gengis.
KPMG ehf. er styrktaraðili Ólafíu Þórunnar, Golfsambands Íslands og Golfklúbbs Reykjavíkur.