Haraldur Franklín Magnús, GR eru á meðal keppenda á Empordà Challenge mótinu sem fram fer á samnefndum velli við borgina Girona á Spáni. Mótið er hluti af Áskorendamótaröðinni, Challenge Tour, sem er í næst efsta styrkleikaflokki á eftir sjálfri DP Evrópumótaröðinni.
Mótið hófst í dag fimmtudaginn 9. júní og verða leiknir fjórir hringir á fjórum keppnisdögum.
Haraldur Franklín fór beint til Spánar eftir að hafa tekið þátt á úrtökumóti fyrir US Open risamótið s.l. mánudag, 6. júní. Þar var hann hársbreidd frá því að komast inn á risamótið en hann lék í átta manna bráðabana um 3 laus sæti á risamótinu.
Nánari upplýsingar um mótið, rástímar, staða og úrslit:
Á þessu tímabili hefur Haraldur Franklín leikið á sjö mótum á Áskorendamótaröðinni. Hann hefur komist í gegnum niðurskurðinn á tveimur mótum og hann nálægt var nálægt sigri á einu þeirra og endaði í 3. sæti.
Haraldur Franklín er í 39. sæti á stigalistanum.
Í fyrra endaði Haraldur Franklín í 48. sæti á stigalistanum og var hársbreidd frá því að komast inn á lokamót Áskorendamótaraðarinnar þar sem að 45 efstu keppendurnir kepptu um 20 efstu sætin sem tryggðu þeim keppnisrétt á sjálfri Evrópumótaröðinni. Haraldur Franklín lék á alls 19 mótum í fyrra og fékk alls 35,816 stig.
Guðmundur Ágúst Kristjánsson er ekki á meðal keppenda á þessu móti.
Aðeins tveir kylfingar frá Íslandi hafa komist inn á lokamót Áskorendamótaraðarinnar – Birgir Leifur Hafþórsson og Guðmundur Ágúst Kristjánsson.
Guðmundur Ágúst endaði í 46. sæti árið 2020.
Birgir Leifur endaði í 35. sæti árið 2017.
Áskorendamótaröðin var sett á laggirnar árið 1989. Frá þeim tíma hafa margir þekktir kylfingar nýtt sér mótaröðina sem stökkpall inn á Evrópumótaröðina – DP Tour. Þar má nefna Thomas Bjørn (1995), Justin Rose (1999), Ian Poulter (1999), Henrik Stenson (2000), Louis Oosthuizen (2003), Tommy Fleetwood (2011) og Brooks Koepka (2013).
