Fjórir íslenskir kylfingar taka þátt í The R&A Boys’ og Girls’ Amateur Championship, sem hófust í Skotlandi í gær. Mótin eru meðal sterkustu og virtustu unglingamóta heims.
Gunnar Þór Heimisson og Arnar Daði Svavarsson úr GKG og Óliver Elí Björnsson úr Golfklúbbnum Keili keppa í The Boys’ Amateur Championship. Mótið fer fram á Gailes Links vellinum.
Bryndís Eva Ágústsdóttir úr Golfklúbbi Akureyrar er fulltrúi Íslands í The Girls’ Amateur Championship, sem leikið er á Craigielaw-vellinum. Öll fjögur eru í landsliðshópi GSÍ og kepptu fyrir Íslands hönd á Evrópumótum unglingalandsliða fyrr í sumar.
Alls hófu 144 kylfingar leik í hvoru móti. Fyrstu tvo keppnisdagana er leikinn 36 holu höggleikur og komast 64 efstu kylfingarnir áfram í holukeppni. Þar tekur við útsláttarkeppni sem lýkur laugardaginn 15. ágúst. Úrslitaleikirnir eru leiknir yfir 36 holur.
Gunnar Þór lék best á fyrsta hringnum. Hann lék á 72 höggum, einu höggi yfir pari, og var jafn í 53. sæti.
Óliver Elí lék fyrsta hringinn á 76 höggum, fimm höggum yfir pari, og var jafn í 118. sæti. Arnar Daði kom í hús á 77 höggum, sex höggum yfir pari, og var jafn í 128. sæti.
Bæði mótin eiga sér langa og merka sögu. Margir af fremstu kylfingum heims hafa keppt í mótunum og meðal fyrrverandi sigurvegara eru José María Olazábal, Sergio García, Matt Fitzpatrick, Anna Nordqvist, Suzann Pettersen og Georgia Hall.
Sigurvegararnir tryggja sér þátttökurétt í nokkrum stórum mótum. Sigurvegari piltamótsins fær meðal annars þátttökurétt í The Amateur Championship og lokaúrtöku fyrir The Open. Sigurvegari stúlknamótsins fær meðal annars þátttökurétt í The Women’s Amateur Championship, U.S. Girls’ Junior og lokaúrtöku fyrir AIG Women’s Open, auk boðs í Augusta National Women’s Amateur.
Hægt er að fylgjast með The Boys’ Amateur og The Girls’ Amateur á heimasíðu The R&A.
