Eiríka Malaika Stefánsdóttir úr Golfklúbbi Mosfellsbæjar er Íslandsmeistari unglinga í höggleik í flokki 13-14 ára stúlkna. Eiríka lék hringina þrjá á samtals 228 höggum, tólf höggum yfir pari Þorláksvallar, og sigraði með níu högga mun.

Íslandsmót unglinga í höggleik fór fram dagana 20.-22. ágúst og var leikið á tveimur völlum. Kylfingar á aldrinum 15-18 ára léku á Hvaleyrarvelli hjá Golfklúbbnum Keili en kylfingar 14 ára og yngri á Þorláksvelli hjá Golfklúbbi Þorlákshafnar. Keppt var í átta aldursflokkum og leikinn höggleikur án forgjafar. Í flokki 13-14 ára voru leiknar 54 holur, 18 holur á hverjum keppnisdegi.

Eiríka lék fyrsta hringinn á 79 höggum og var einu höggi frá efsta sætinu eftir fyrsta keppnisdag. Hún lék annan hringinn á 72 höggum, pari vallarins. Þar fékk hún sex fugla, þar af fjóra á síðustu átta holunum, og var með ellefu högga forskot fyrir lokahringinn.

Eiríka lék lokahringinn á 77 höggum og tryggði sér Íslandsmeistaratitilinn. Hún fékk ellefu fugla á hringjunum þremur og lauk mótinu á samtals 228 höggum.

Elísabet Þóra Ólafsdóttir úr Nesklúbbnum varð önnur á 237 höggum, 21 höggi yfir pari. Hún lék lokahringinn á 75 höggum, sem var hennar besti hringur í mótinu. Hrafnhildur Sigurðardóttir úr Golfklúbbi Kópavogs og Garðabæjar hafnaði í þriðja sæti, einu höggi á eftir Elísabetu, á samtals 238 höggum.

Eiríka Malaika vann einnig Íslandsmeistaratitilinn í holukeppni í sama aldursflokki fyrr í sumar.

Smelltu hér til að sjá öll úrslit mótsins