Aron Emil Gunnarsson úr Golfklúbbi Selfoss og Perla Sól Sigurbrandsdóttir úr Golfklúbbi Reykjavíkur eru stigameistarar GSÍ mótaraðarinnar árið 2026.

Aron Emil fagnar sínum fyrsta stigameistaratitli en Perla Sól vinnur titilinn í annað sinn. Hún varð einnig stigameistari árið 2023.

Perla Sól á meðal efstu fimm í öllum mótum sumarsins

Perla Sól lék í öllum sjö mótum GSÍ mótaraðarinnar og lauk tímabilinu með 4.560 stig. Hún var 860 stigum á undan Guðrúnu Brá Björgvinsdóttur, sem varð önnur með 3.700 stig.

Mikill stöðugleiki einkenndi sumar Perlu, en hún hafnaði í einu af fimm efstu sætunum í öllum mótum mótaraðarinnar.

Perla hóf tímabilið á sigri í Reykjanesmótinu og fékk þar 1.000 stig. Hún varð önnur í Korpubikarnum, fimmta í Powerade-mótinu í Þorlákshöfn og þriðja á Íslandsmótinu í holukeppni.

Hún deildi öðru sætinu í Hvaleyrarbikarnum og varð jöfn í þriðja sæti í Lexus-bikarnum á Leirdalsvelli. Perla lauk svo sumrinu í fjórða sæti á Íslandsmótinu í golfi á Korpúlfsstaðavelli.

Árangur Perlu í mótum sumarsins:

Fjóla Margrét Viðarsdóttir varð þriðja á stigalistanum með 2.838 stig. Eva Kristinsdóttir varð fjórða með 2.752 stig og Elsa Maren Steinarsdóttir fimmta með 2.601 stig.

Aðeins 110 stig skildu að Aron og Aron

Baráttan um stigameistaratitilinn í karlaflokki var spennandi. Aron Emil lauk tímabilinu með 4.178 stig, einungis 110 stigum meira en Aron Snær Júlíusson, sem varð annar með 4.068 stig.

Aron Emil lék í öllum sjö mótum sumarsins og var aldrei neðar en í sjöunda sæti. Hann vann ekki mót á tímabilinu en stöðug og góð frammistaða skilaði honum fyrsta stigameistaratitlinum.

Hann hóf sumarið í fjórða sæti í Reykjanesmótinu og varð annar í Korpubikarnum. Aron Emil varð sjöundi í Powerade-mótinu og þriðji á Íslandsmótinu í holukeppni.

Hann deildi fimmta sætinu í Hvaleyrarbikarnum og öðru sætinu í Lexus-bikarnum. Aron Emil lauk svo tímabilinu annar á Íslandsmótinu í golfi, þar sem hann fékk 1.050 stig og tryggði sér stigameistaratitilinn.

Árangur Arons Emils í mótum sumarsins:

Sigurður Bjarki Blumenstein varð þriðji á stigalistanum með 2.693 stig. Axel Bóasson varð fjórði með 2.630 stig og Böðvar Bragi Pálsson fimmti með 2.619 stig.

Fyrst var keppt um stigameistaratitla kvenna og karla á Íslandi árið 1989. Perla Sól bætir nú öðrum titli sínum við þann sem hún vann árið 2023, en Aron Emil kemst í fyrsta sinn á lista stigameistara GSÍ mótaraðarinnar.

Til hamingju með árangurinn Aron og Perla!

Stigameistarar í kvennaflokki frá upphafi:

Stigameistarar í karlaflokki frá upphafi: