N1 Unglingamótinu, sjöunda og síðasta móti ársins á Unglingamótaröð GSÍ, lauk á Korpúlfsstaðavelli í dag. Benjamín Snær Valgarðsson og Pamela Ósk Hjaltadóttir, bæði úr Golfklúbbi Kópavogs og Garðabæjar, léku best allra í pilta- og stúlknaflokki.
Alls tóku 84 kylfingar þátt í mótinu, 55 piltar og 29 stúlkur. Leikið var í flokkum 15-18 ára pilta og stúlkna, en einnig voru veitt verðlaun fyrir bestan árangur í flokki 15-16 ára. Leiknar voru 54 holur á lykkjunum Sjórinn og Áin, 36 holur á laugardeginum og 18 holur á lokahringnum í dag.
Benjamín Snær lék alla hringina undir pari
Benjamín Snær Valgarðsson, GKG, sigraði mótið í piltaflokki. Hann lék hringina þrjá á 69, 68 og 70 höggum og lauk leik á níu höggum undir pari. Benjamín fékk átján fugla á hringjunum þremur, sem reyndist fimm fuglum fleiri en næsti kylfingur.
Gunnar Þór Heimisson og Hjalti Kristján Hjaltason, einnig úr GKG, deildu öðru sætinu á sex höggum undir pari. Gunnar lék hringi sína á 72, 67 og 71 höggum en Hjalti á 73, 68 og 69 höggum.
Hjalti Kristján fékk einnig verðlaun fyrir besta skor kylfings í flokki 15-16 ára.
Pamela Ósk sigraði á pari
Pamela Ósk Hjaltadóttir, GKG, sigraði stúlknaflokkinn með sjö högga mun. Pamela lék besta hring flokksins á fyrsta hring þegar hún kom í hús á 68 höggum. Hún fylgdi því eftir með tveimur 74 högga hringjum og lauk leik á pari vallarins.
Embla Hrönn Hallsdóttir, GKG, varð önnur á sjö höggum yfir pari og Björk Hannesdóttir úr Golfklúbbi Akureyrar varð þriðja á níu höggum yfir pari.
Elva María Jónsdóttir úr Golfklúbbnum Keili lék best í flokki 15-16 ára stúlkna. Hún lék hringina á 78, 78 og 77 höggum og lauk leik á sautján höggum yfir pari.
Öll úrslit mótsins má nálgast í GolfBox
Frábæru móti lokið og Unglingamótaröðin því búin á árinu 2026. Stigameistarar sumarsins voru einnig krýndir í dag, en úrslitin verða gerð upp hér á golf.is.
