European Young Masters lauk í dag á Parador de El Saler-vellinum við Valencia á Spáni. Fjórir íslenskir kylfingar tóku þátt í mótinu og náði Elva María Jónsdóttir bestum árangri þeirra með því að enda jöfn í tíunda sæti stúlknaflokksins.
Fjórir íslenskir kylfingar tóku þátt í mótinu: Halldór Jóhannsson (GK), Elva María Jónsdóttir (GK), Elísabet Þóra Ólafsdóttir (NK) og Máni Freyr Vigfússon (GK).
Elva lék lokahringinn á 73 höggum, einu höggi yfir pari, líkt og á öðrum keppnisdeginum. Hún fékk þrjá fugla og fjóra skolla á hringnum.
Elva lék hringina þrjá á 77, 73 og 73 höggum. Hún lauk leik á sjö höggum yfir pari og fór upp um tólf sæti á lokadeginum.
Elísabet Þóra Ólafsdóttir endaði í 50. sæti stúlknaflokksins á 42 höggum yfir pari. Hún lék hringina á 85, 85 og 88 höggum.
Í piltaflokki varð Halldór Jóhannsson jafn í 41. sæti á 18 höggum yfir pari. Halldór lék lokahringinn á 77 höggum, fimm yfir pari, og var það besti hringur hans í mótinu. Hringir hans voru upp á 79, 78 og 77 högg.
Máni Freyr Vigfússon varð jafn í 54. sæti á 30 höggum yfir pari. Hann lék hringina þrjá á 83, 80 og 83 höggum.
Ísland í 25. sæti liðakeppninnar
Ísland endaði í 25. sæti liðakeppninnar á 55 höggum yfir pari. Þrjú bestu skor hverrar þjóðar á hverjum keppnisdegi giltu til úrslita.
Skor Elvu Maríu, Halldórs og Mána Freys töldu hjá Íslandi á lokahringnum. Þau léku samanlagt á 233 höggum og færðist Ísland upp um eitt sæti.
Frakkland sigraði liðakeppnina á tíu höggum undir pari. Spánn varð í öðru sæti á sjö höggum undir pari og Þýskaland hafnaði í þriðja sæti á einu höggi undir pari.
