Árið 2025 voru slegin yfir 25 milljón högg í TrackMan golfhermum og æfingasvæðum á Íslandi. Um 35 þúsund kylfingar hér á landi nýta sér þessa tækni og talan undirstrikar hraða þróun í golfi þar sem tæknilausnir og breytt aðgengi eru að umbreyta íþróttinni.
Til að setja töluna í samhengi þá jafngildir hún því að hver skráður kylfingur í golfklúbbi á Íslandi hafi slegið um 850 högg í golfhermi á árinu eða um 69 högg á hvern Íslending. Þetta samsvarar um 31 klukkustund í golfhermi á hvern kylfing á ári.
Síðustu ár hefur orðið gríðarlegur vöxtur í golfhermum hér á landi. Samkvæmt greiningu GSÍ og KPMG hafa tekjur af golfhermum nær þrefaldast á aðeins þremur árum eða úr um 109 milljónum króna árið 2021 í yfir 328 milljónir árið 2024. Á sama tíma hefur golfhermum fjölgað hratt og eru þeir nú yfir tvö hundruð talsins á Íslandi.
Þessi þróun er drifin áfram af tækniframförum þar sem tæknilausnir, gagnagreining og sífellt þróaðri gervigreind gerir kylfingum kleift að æfa markvissara. Golfhermar í dag eru því ekki aðeins afþreying heldur tæki til þjálfunar sem safna gögnum um sveiflu, boltaflug og frammistöðu og umbreyta þeim í einfalda endurgjöf til kylfinga.
Á sama tíma hafa þessar tæknilausnir haft víðtæk hagræn áhrif. Golfhermar hafa opnað nýja tekjustrauma, aukið aðgengi nýrra hópa að íþróttinni og lengt tímabil iðkunar yfir allt árið.
Þróunin sýnir skýrt að golfíþróttin er að færast frá því að vera árstíðabundin útivistaríþrótt yfir í heilsársíþrótt þar sem tækni gegnir lykilhlutverki bæði í upplifun kylfinga og í vexti íþróttarinnar.
