Uppfært:

Gunnlaugur hefur farið frábærlega af stað og situr jafn í 2. sæti mótsins. Hann lék seinni níu holurnar á þremur höggum undir pari, og bætti enn einum fuglinum við á sinni elleftu holu. Hann er fjóra undir pari eftir tólf holur og veður spennandi að fylgjast með næstu 24 holum hans.

Gunnlaugur Árni Sveinsson, kylfingur GKG, tekur þátt í lokaúrtökumóti fyrir U.S. Open í dag, mánudaginn 19. maí, á Bent Tree Country Club vellinum í Dallas, Texas. Gunnlaugur fer af stað klukkan 7:09 að staðartíma (12:09 að íslenskum tíma). 86 kylfingar munu berjast um 7 laus sæti, en þar á meðal eru margfaldir sigurvegarar á PGA mótaröðinni. Ljóst er að samkeppnin verður hörð.

Lokaúrtökumót U.S. Open er síðasta stigið í átt þátttöku í einu af fjórum risamótum golfsins. Þar leika kylfingar 36 holur á einum degi, og aðeins þeir efstu tryggja sér sæti á sjálfu U.S. Open mótinu. Lokaúrtökumótin fara fram á 13 stöðum, en Dagbjartur Sigurbrandsson mun leika í einu þeirra þann 2. júní.

Gunnlaugur Árni verður í holli með tveimur öflugum kylfingum:

• Thomas Rosenmüller: Þjóðverji sem leikur á PGA mótaröðinni og var liðsfélagi Hlyns Bergssonar í háskólagolfinu hjá North Texas.
  
• Lance Simpson: Bandarískur áhugamaður sem leikur fyrir háskólalið Tennessee. Hann er í 41. sæti á heimslista áhugamanna (WAGR), einu sæti fyrir neðan Gunnlaug, og var einu höggi á eftir honum í nýlegu svæðismóti NCAA.

Margir þekktir kylfingar taka þátt í lokaúrtökumótinu í Dallas. Meðal þeirra eru LIV Golf kylfingarnir:

• Abraham Ancer
• Branden Grace
• Cameron Tringale
• Carlos Ortiz
• Kevin Na
• Sergio Garcia

Svo margir eru PGA kylfingarnir í mótinu að merkara þótti að taka saman lista yfir þá þeirra sem hafi unnið á mótaröðinni:

• Aaron Baddeley
• Austin Eckroat 
• Cameron Champ
• Charley Hoffman 
• Kevin Chappell 
• Kevin Yu 
• James Hahn 
• Joel Dahmen 
• Mackenzie Hughes 
• Peter Malnati 
• Ryan Moore 
• Taylor Moore
• Tom Kim
• O.fl.

Gunnlaugur Árni hefur verið frábær á háskólamótum í Bandaríkjunum undanfarið ár og fær nú tækifæri til að komast á sitt fyrsta risamót. Hann lék æfingahringinn sinn með PGA sigurvegaranum Joel Dahmen, og er jákvæður fyrir deginum.

Hér má fylgjast með skori mótsins

Áfram Gulli!