Vormót GÞ hefst laugardaginn 24. maí á Þorláksvelli hjá Golfklúbbi Þorlákshafnar.

Í mótinu munu keppendur leika 36 holur án forgjafar í breyttri punktakeppni, bæði í liðakeppni og einstaklingskeppni. Leiknar eru 18 holur á laugardegi í ProAm móti og 18 holur á sunnudegi. Stigagjöf er eftirfarandi:

• Albatross: 8 punktar
• Örn: 5 punktar
• Fugl: 2 punktar
• Par: 0 punktar
• Skolli: -1 punktur
• Tvöfaldur skolli eða verra: -3 punktar

Smelltu hér fyrir rástíma, stöðu og úrslit.

Fyrri keppnisdagur

Veðrið lék við kylfinga á fyrri keppnisdegi VitHit Vormóts GÞ. Þvert á veðurspá fyrr í vikunni var logn og blíða á Þorlákshöfn í dag. Völlurinn er einnig í flottu standi svo það voru svo gott sem fullkomnar aðstæður til að spila golf.

Fyrirkomulagið í dag var ProAm mót þar sem tveir almennir kylfingar léku með tveimur kylfingum úr GSÍ mótinu. Í Vormótum er fyrirkomulagið breytt punktakeppni, en stigagjöfina má sjá hér að ofan.

Mikil gleði var á vellinum í dag og skorið eftir því.

Í karlaflokki var það Sigurður Bjarki Blumenstein, GR, sem lék best, en hann fékk 15 punkta á hringnum. Einn örn, sex fuglar og tveir skollar skiluðu honum efsta sætinu. Sigurður var einn af fimm kylfingum í karlaflokki sem fengu örn á hring dagsins, en ernir geta skipt sköpum í breyttu punktakeppninni.

Á eftir Sigurði er Arnór Tjörvi Þórisson, GR, sem lék á 14 punktum. Arnór fékk flesta fugla allra kylfinga í dag, eða níu talsins.

Jafnir í þriðja sæti eru Tómas Hjaltested, GR, og Kristófer Karl, GM. Tómas varð annar í Vormóti GM um síðustu helgi og hefur því sumarið af krafti. Kristófer fékk örn á níundu holu eftir frábært teighögg á par 4 holunni.

Í kvennaflokki er Heiðrún Anna Hlynsdóttir, GOS, efst eftir fyrri keppnisdag. Hún er tólf punktum á undan öðru sætinu, en Heiðrún lék gott golf í dag og lauk leik með 8 punkta.

Heiðrún fékk bæðir flest pör og flesta fugla í kvennaflokki.

Á eftir Heiðrúnu koma Katrín Hörn, GKG, og Hafdís Alda, GK, á -4 og -5 punktum. Það verður hart barist um verðlaunasætin á morgun.

Guðrún Birna Snæþórsdóttir var eini kylfingurinn í kvennaflokki sem fékk örn. Það gerði hún á 9. holunni, sem spilaðist ein af erfiðari holum dagsins.

Keppendur eru alls 42, sem var hámarksfjöldi í mótið. Koma þeir frá 9 klúbbum víðs vegar af landinu.

Í karlaflokki eru 34 keppendur. Meðalforgjöf í karlaflokki er +2, sú lægsta er +5.3 og sú hæsta er 0.7. Fimmtán kylfingar eru með +2 eða lægra í forgjöf, og má því búast við hörkuskori í mótinu. Sigurvegari Vormóts GM, Andri Már Óskarsson er á meðal keppenda. Einnig mæta Tómas Eiríksson Hjaltested og Aron Emil Gunnarsson, sem voru í verðlaunasæti á síðasta móti.

Í kvennaflokki eru 8 keppendur. Meðalforgjöf keppenda er 2.9, sú lægsta er +1.1 og sú hæsta er 7. Engin af efstu fjórum keppendunum úr Vormóti GM tekur þátt þessa helgina þannig búast má við sveiflum á stigalistanum.

GR á flesta keppendur í mótinu eða 14 talsins, GK er með 8 keppendur og GKG eru með 7.