Íslandsmóti eldri kylfinga lauk þann 19. júlí á Strandarvelli hjá Golfklúbbi Hellu.

Keppendur voru alls 85 og voru leiknar 54 holur á þremur keppnisdögum. Í kvennaflokki voru 24 keppendur og 61 í karlaflokki.

Keppt var í tveimur aldursflokkum hjá báðum kynjum, 50 ára og eldri, og 65 ára og eldri.

Þórdís Geirsdóttir, GK, vann mótið í flokki 50 ára og eldri kvenna. Þórdís lék mótið á tíu höggum yfir pari, og vann flokkinn með sextán höggum. Hringir hennar voru 76-72-72 högg. Þórdís hefur nú unnið mótið í tíu af síðustu ellefu skiptum, en hún endaði í öðru sæti í fyrra. Ragnheiður Sigurðardóttir, GKG, sem sigraði mótið í fyrra, endaði í öðru sæti á +26. Hörkubarátta var um bronsið, en Írunn Ketilsdóttir, GM, varð einu höggi á undan Elsu Nielsen, NK. Írunn fékk örn á 17. holuna, sem reyndist mikilvægt högg í baráttunni um verðlaunasæti.

Sigurbjörn Þorgeirsson, GFB, sigraði flokk 50 ára og eldri karla eftir frábæra spilamennsku. Sigurbjörn lauk leik á fjórum undir pari í heildina, með skor upp á þrjá undir par á síðasta keppnisdegi. Enginn fékk fleiri fugla en Ólafsfirðingurinn, eða 12 stykki. Guðmundur Rúnar Hallgrímsson, GS, varð annar á tveimur yfir pari og Ólafur Hreinn Jóhannesson, GSE, varð þriðji á þremur yfir.

Gífurleg spenna var í flokki 65 ára og eldri kvenna. Þrír kylfingar voru jafnir fyrir lokaholuna á 27 höggum yfir pari. María Málfríður Guðnadóttir, GKG, gerði sér lítið fyrir og fékk fugl á 54. holunni og sigraði með því flokkinn. Steinunn Sæmundsdóttir, GR, fékk par og hafnaði í öðru sæti. Ríkjandi meistarinn, Guðrún Garðars, GR, fékk skolla og þurfti að sætta sig við þriðja sætið.

Hannes Eyvindsson, GR, varði titil sinn í karlaflokki 65 ára og eldri, en hann var fimm höggum betri en Hlöðver Sigurgeir Guðnason, GR. Magnús Birgisson, GK, varð þriðji. Hannes varð þrívegis Íslandsmeistari í golfi á árunum 1978-1980.

Úrslit:

Konur +50 ára:

1. Þórdís Geirsdóttir, GK 220 högg (+10) (76-72-72).
2. Ragnheiður Sigurðardóttir, GKG 236 högg (+26) (80-74-82).
3. Írunn Ketilsdóttir, GM 244 högg(+34) (80-85-79).

Karlar +50 ára:

1. Sigurbjörn Þorgeirsson, GFB 206 högg (-4) (69-70-67).
2. Guðmundur Rúnar Hallgrímsson, GS 212 högg (+2) (72-67-73).
3. Ólafur Hreinn Jóhannesson, GSE 213 högg (+3) (68-71-74).

Konur +65 ára:

1. María Málfríður Guðnadóttir, GKG 236 högg (+26) (81-74-81).
2. Steinunn Sæmundsdóttir, GR 237 högg (+27) (74-83-80).
3. Guðrún Garðars, GR 238 högg (+28) (83-75-80).

Karlar +65 ára:

1. Hannes Eyvindsson, GR 227 högg (+17) (76-75-76).
2. Hlöðver Sigurgeir Guðnason, GKG 232 högg (+22) (75-77-80).
3. Magnús Birgisson, GK 234 högg (+24) (83-76-75).

Smelltu hér fyrir úrslit:

Keppendur komu frá 18 mismunandi klúbbum víðsvegar af landinu. GR var með flesta keppendur eða 20 alls og GKG með 16.

Í flokki +50 karla voru 47 keppendur.

Sigurbjörn Þorgeirsson var þar með lægstu forgjöfina, +0.7, en hæsta forgjöfin var 15.7.

Í flokki kvenna +50 voru 15 leikmenn skráðir til leiks.

Þórdís Geirsdóttir var með lægstu forgjöfina, eða 0.5, en sú hæsta var 17.1.

Í flokki +65 ára karla voru 14 keppendur.

Lægstu forgjöfina bar Hannes Eyvindsson, 2.1, en hæsta forgjöfin var 17.1.

Í flokki +65 ára kvenna voru 9 keppendur.

Lægsta forgjöf flokksins var 7.7 en sú hæsta 15.5.