Íslenska kvennalandsliðið í golfi sem keppir á heimsmeistaramóti áhugamanna er í 33. sæti eftir fyrsta keppnisdaginn af fjórum. Ólafía Þórunn Kristinsdóttir úr Golfklúbbi Reykjavíkur lék á 74 höggum +2 , Guðrún Brá Björgvinsdóttir úr Golfklúbbnum Keili og Sunna Víðisdóttir úr Golfklúbbi Reykjavíkur léku á 75 +3 en tvö bestu skorin á hverjum hring telja. Ísland er á +5 samtals í 33 sæti ásaamt Rússlandi. Ólafía er í 50. sæti í einstaklingskeppninni en Sunna og Guðrún Brá eru í 65. sæti.

Úlfar Jónsson þjálfari íslenska kvennalandsliðsins segir golfið hafi verið stöðugt á fyrsta keppnisdeginum.

„Við erum ágætlega sátt við spilamennskuna, golfið var stöðugt hjá stelpunum, sem er mjög jákvætt á fyrsta degi. Engin teljandi vandræði en skollarnir skrifast flestir á þrípútt eða misst pútt eftir vipp.  Það eru tækifæri til að klípa nokkur högg af skorkortinu og liggur það helst á flötunum, en fleiri pútt af 2-4 metra færi mættu detta. Það var því unnið áfram vel í því á æfingaflötinni eftir hring,“ sagði Úlfar en íslenska liðið lék á Iriyama vellinum eða vesturvellinum á fyrsta hringnum en á morgun leikur liðið á Oshitate vellinum sem er austurvöllurinn.

Liðakeppnin.

Einstaklingskeppnin.