Guðrún Brá Björgvinsdóttir, atvinnukylfingur úr GK, hóf leik í dag á Jabra Ladies Open mótinu sem er hluti af LET Evrópumótaröðinni, sem er í efsta styrkleikaflokki atvinnumótaraða í kvennaflokki í Evrópu.
Mótið fer fram á hinum þekkta Evian velli í Frakklandi – þar sem að árlega fer fram samnefnt risamót á LPGA og LET-mótaröðunum.
Leiknar verða 54 holur á þremur keppnisdögum og er heildarverðlaunaféð á mótinu 300 þúsund Evrur. Par vallar er 71.
Þetta er annað mótið á tímabilinu hjá Guðrúnu Brá á LET Evrópumótaröðinni. Hún lék síðast í Kenía á fyrsta móti tímabilsins. Guðrún Brá náði ekki að komast í gegnum niðurskurðinn á því móti.
Smelltu hér fyrir rástíma, stöðu og úrslit frá Jabra Ladies Open.
Guðrún Brá er í ráshóp með Agathe Sauzon frá Frakklandi og Laura Beveridge frá Skotlandi. Þær hefja leik á öðrum keppnisdegi kl. 16:20 að íslenskum tíma eða 14.20 að staðartíma í Frakklandi.