Evrópumót kvenna, karla, stúlkna – og pilta hefjast þriðjudaginn 8. júlí. Ísland er með lið í öllum fjórum mótunum.
Evrópumót pilta fer fram í Ungverjalandi og leikur piltaliðið í 2. deild. Níu sveitir mætast á Zala Springs Golf Resort vellinum í Ungverjalandi.
Fyrirkomulag mótsins er tveggja daga höggleikur og þriggja daga holukeppni. Leikinn er 36 holu höggleikur fyrstu tvo keppnisdagana. Fimm af sex bestu skorunum telja í höggleiknum og því mikilvægt fyrir alla að skila inn góðri frammistöðu. Síðustu 3 daga mótsins er útsláttarkeppni. Efstu lið mótsins fara upp í efstu deild, sem er að sjálfsögðu markmið okkar manna.
Íslenska piltalandsliðið hafnaði í 4. sæti höggleiksins eftir flotta spilamennsku. Markús Marelsson leiddi liðið og lék næstbest allra kylfinga mótsins. Hann kom í hús á fimm höggum undir pari, fékk fimm fugla, örn og tvo skolla.
Liðið leikur gegn pólsku sveitinni um sæti í undanúrslitum mótsins. Þar bíður ítalska sveitin, sem lék best allra í höggleiknum.
Fyrir hádegi eru leiknir tveir leikir í fjórmenning, og eftir hádegi eru fimm leikir í tvímenning. Arnar Daði og Gunnar Þór mynda fyrra teymið í fyrramálið og Guðjón Frans og Markús það seinna.
Strákarnir sigurðu leikinn 4-3 eftir hetjulega baráttu. Ólíver Elí tryggði sigurinn með frábærum sigri í bráðabana.
Með sigrinum tryggðu strákarnir sér sæti í undanúrslitum mótsins, þar sem lið Ítalíu beið þeirra. Ítalir sigruðu höggleikinn og voru fyrir mótið taldir líklegir til afreka.
Leiknum lauk með 5-2 sigri Ítala. Guðjón Frans og Arnar Daði sigruðu leik sinn í fjórmenning, og Markús Marelsson hélt áfram góðri spilamennsku sinni og sigraði leik sinn í tvímenning. Ítalir því áfram í úrslit, og íslenska liðið á leiðinni í leik um bronsið.
Sigur er mikilvægur í síðasta leiknum, en efstu þrjú lið mótsins leika í efstu deild á næsta ári.
Þar mætti íslenska liðið því pólska á nýjan leik. Leikurinn fór vel af stað og komst íslenska liðið 2-0 yfir. Sigrarnir komu úr báðum fjórmennings viðureignunum, en sigrarnir voru aldrei í hættu.
Piltarnir þurftu því að sækja tvö stig af fimm mögulegum í tvímenning eftir hádegi. Gunnar Þór sótti fyrsta stigið með öruggum 5/4 sigri í sinni viðureign.
Þeir fjórir leikir sem eftir voru reyndust gífurlega jafnir, og hefðu getað dottið öðru hvoru megin. Okkar menn sýndu mikinn kjark á lokakaflanum. Markús Marelsson skilaði liðinu hálfu stigi, en það var Arnar Daði Svavarsson sem sigldi sigrinum heim með sigri á 18. holunni.
3. sætið í hús og piltaliðið leikur í efstu deild á næsta ári! Flottir.
Evrópumót pilta 8.-12. júlí í Ungverjalandi
Smelltu hér fyrir stöðuna hjá piltunum:
Sveit Íslands skipa:
Arnar Daði Svavarsson, GKG
Guðjón Frans Halldórsson, GKG
Gunnar Þór Heimisson, GKG
Hjalti Kristján Hjaltason, GM
Markús Marelsson, GK
Óliver Elí Björnsson, GK
Þjálfari: Andri Þór Björnsson
Sjúkraþjálfari: Bjarni Már Ólafsson
Zala Springs Resort völlurinn er hannaður af hinum virta golfvallahönnuði Robert Trent Jones Jr. Völlurinn, sem er par 72 og spannar 6.351 metra, fellur fallega inn í umhverfið þar sem vínakrar og vötn umlykja svæðið.
Við munum fylgjast með gengi okkar kylfinga á öllum helstu miðlum GSÍ, fylgist með.
