Lokamót LET Access mótaraðarinnar fór fram á Gambito Golf Calatayud vellinum á Spáni dagana 16.-18. október. Í mótið mættu efstu kylfingar tímabilsins og var til mikils að vinna. Efstu sjö kylfingar stigalistans í lok tímabils vinna sér inn fullan þátttökurétt á LET (Evrópumótaröðinni).

Atvinnukylfingarnir Ragnhildur Kristinsdóttir (Ragga) og Andrea Bergsdóttir voru báðar á meðal keppenda mótsins. Eftir öfluga spilamennsku tímabilsins sat Ragga í sjötta sæti stigalistans fyrir lokamótið og Andrea í því tólfta.

Eftir frábæra byrjun á fyrsta hring náði Ragga ekki í gegnum niðurskurð og lék hringi sína á 71-77 höggum. Hún endar tímabilið því í 8. sæti, einungis tveimur stigum frá efstu 7.

Andrea lék mótið á 72-72-75 höggum og endaði jöfn í 41. sæti. Með árangrinum sótti hún nokkur stig á stigalistanum, en þó ekki nógu mörg til að komast úr 12. sætinu.

Úrslit mótsins

Þrátt fyrir að hafa ekki komist beint inn á LET mótaröðina er enn tækifæri fyrir Andreu og Röggu að öðlast þar þátttökurétt. Eftir frábæra spilamennsku tímabilsins hafa þær báðar tryggt sér sæti í lokaúrtökumóti LET mótaraðarinnar sem fram fer 16.-20. desember í Marokkó. Þar munu kylfingar úr öllum áttum mæta og spila upp á 20 laus sæti í sterkustu mótaröð Evrópu.

Lokastöðu stigalistans má sjá hér að neðan: