Allt er jafnt í úrslitaleik Ólivers Elí Björnssonar og Svíans Ludwigs Libera á Opna breska áhugamannamóti pilta þegar fyrri 18 holunum er lokið. Leiknar eru 36 holur í holukeppni í úrslitaleiknum.
Leikurinn hefur verið í járnum frá upphafi og hvorugur kylfingur hefur náð meira en einnar holu forskoti. Óliver byrjaði vel og vann fyrstu holuna með fugli en Libera jafnaði leikinn á þeirri fimmtu.
Óliver komst aftur yfir með pari á áttundu holu, en Libera svaraði strax og jafnaði á þeirri tíundu. Svíinn vann síðan elleftu holuna og komst yfir í fyrsta sinn í leiknum.
Viðbrögð Ólivers voru góð. Hann fékk tvo fugla í röð á tólftu og þrettándu holu og komst aftur eina holu upp. Libera jafnaði á 16. holu og kylfingarnir voru áfram jafnir eftir átján.
Óliver hefur leikið frábært golf alla vikuna. Hann hefur nú unnið fimm leiki í röð í útsláttarhluta mótsins. Í undanúrslitunum hafði hann betur gegn Tao Pemerika frá Frakklandi, ríkjandi Evrópumeistara unglinga.
Sigurvegari mótsins fær meðal annars þátttökurétt í Opna breska áhugamannamótinu og kemst beint í lokaúrtökumót fyrir The Open.
