Gunnlaugur Árni lék vel á fyrsta hring The Hayt háskólamótsins á Sawgrass CC í Flórída í dag. Hann fékk sjö fugla á hringnum og lauk leik á 67 höggum, fimm höggum undir pari vallar. Hann er jafn fjórum öðrum kylfingum í 2. sæti og er einu höggi á eftir William Love sem leiðir mótið.
Gunnlaugur Árni lék í dag í sama ráshóp og Jackson Koivun sem er langefstur á heimslista áhugakylfinga og endaði þrisvar á meðal sex efstu kylfinganna í mótum á PGA mótaröðinni á síðasta ári. Gunnlaugur var einu höggi betri en Jackson í dag og munu þeir leika aftur saman á morgun og hefja leik kl. 15:13 á íslenskum tíma.
Skóli Gunnlaugs Árna, LSU, leiðir mótið í liðakeppninni á fjórtán höggum undir pari og er tveimur höggum á undan Virginíu og fimm höggum á undan Auburn en þessir skólar eru í fyrstu tveimur sætunum á lista yfir þá skóla sem hafa náð bestum árangri á þessu skólaári.
