Golfklúbburinn Keilir er Íslandsmeistari golfklúbba 2025 í 1. deild kvenna. Þetta er í fjórtánda skiptið sem GK sigrar í efstu deild kvenna. Með sigrinum enduðu þær þriggja ára sigurgöngu GM í mótinu. Úrslitin réðust á Jaðarsvelli á Akureyri í dag, en andstæðingurinn í úrslitum mótsins var Golfklúbbur Reykjavíkur.

Smelltu hér til að sjá úrslit allra leikja mótsins

Alls tóku átta lið þátt í 1. deild kvenna í keppninni um Íslandsmeistaratitil golfklúbba 2025. 

Liðunum var skipt í tvo fjögurra liða riðla, þar sem tvö efstu liðin úr hvorum riðli komust í undanúrslit.

Tvö efstu liðin úr hvorum riðli komust í undanúrslit.

A-riðill:

Sveitir GA og GM fóru upp úr A-riðli mótsins. Heimaliðið frá Akureyri lék vel í riðlinum, og hóf mótið með sigri á sveit Mosfellsbæjar, sem kom inn í mótið sem ríkjandi meistari síðustu þriggja ára. GA vann alla sína leiki, en GM vann báða leiki sína eftir tapið gegn GA.

GKG endaði í þriðja sæti riðilsins og GOS í því fjórða.

B-riðill:

Hart var barist um efsta sætið í B-riðli. Eftir sigra í fyrstu tveimur leikjum sínum mættust sveitir GR og GK í hreinum úrslitaleik um efsta sæti riðilsins. Leikurinn var í járnum allan tímann. Elsa Maren Steinarsdóttir setti flott pútt í á 18. holunni, og tryggði GR með því jafntefli í leiknum. Það reyndist nóg, þar sem sveit GR fékk hálfan vinning meira en GK í hinum tveimur leikjum riðilsins.

Golfklúbbur Skagafjarðar endaði í þriðja sæti riðilsins, og Golfklúbburinn Oddur í því fjórða.

Undanúrslit:

Golfklúbburinn Keilir mætti Golfklúbbi Akureyrar í fyrri undanúrslitaleik mótsins. Tvímenningurinn gat ekki skilið liðin að, svo öll augu voru á fjórmenningnum. Þar var staðan jöfn eftir átján holur, og halda þurfti í bráðabana um laust sæti í úrslitum. Hafdís Jóhannsdóttir og Þórdís Geirsdóttir fengu par á fyrstu holu bráðabanans, sem reyndist nóg, og GK því á leið í úrslit mótsins.

Golfklúbbur Reykjavíkur sigraði Golfklúbb Mosfellsbæjar 4-1 í seinni undanúrslitaleiknum. Fjórir af fimm leikjum viðureignarinnar enduðu á átjándu holunni, en flestir þó GR í vil.

Úrslit:

Úrslitaleikurinn var í járnum frá upphafi. Þegar tólf holur voru liðnar voru tveir leikir jafnir, GK upp í tveimur og GR upp í einum.

Staðan breyttist lítillega á síðustu holunum. Keilir sigraði tvo leiki og GR einn, en tveir leikir enduðu í bráðabana. Guðrún Birna(GK) og Valdís Þóra(GR) voru jafnar eftir átján holur, sem og Elsa Maren(GR) og Guðrún Brá(GK).

Elsa fékk fugl á 19. holunni og sigraði leikinn, og öll augu því á leik Valdísar Þóru og Guðrúnar Birnu. Eftir pör á 19. og 20. holunum var það loks á 21. holunni sem hægt var að skilja þær að. Teighögg Valdísar endaði í vítasvæðinu og par Guðrúnar tryggði Íslandsmeistaratitilinn.

Úrslit:

1. Golfklúbburinn Keilir
2. Golfklúbbur Reykjavíkur
3. Golfklúbbur Mosfellsbæjar
4. Golfklúbbur Akureyrar
5. Golfklúbbur Kópavogs og Garðabæjar
6. Golfklúbbur Selfoss
7. Golfklúbbur Skagafjarðar
8. Golfklúbburinn Oddur

Fyrst var leikið á Íslandsmóti golfklúbba í kvennaflokki árið 1982. Mótið í ár er það 42. í röðinni. Frá árinu 1982 hafa 4 klúbbar fagnað þessum titli.

Golfklúbbur Reykjavíkur hefur oftast sigrað eða 22 sinnum, þar á eftir kemur Golfklúbburinn Keilir með 14 titla, Golfklúbbur Mosfellsbæjar er með 5 titla þar af eru þrír titlar þegar Golfklúbburinn Kjölur í Mosfellsbæ var til. Golfklúbbur Kópavogs og Garðabæjar hefur tvívegis fagnað sigri í efstu deild kvenna á Íslandsmóti golfklúbba.

Íslandsmót golfklúbba GSÍ – Íslandsmeistarar frá upphafi: