Flestir af okkar bestu áhugakylfingum horfa til þess eða fara til Bandaríkjanna á íþróttastyrk. Þrátt fyrir að þetta sé ekki eina leiðin til að ná árangri eru flestir sammála um að hún sé best og þá sérstaklega fyrir kylfinga sem vantar að lengja tímabilið sitt og vantar aukinn fjárhagslegan stuðning. Því sterkari skóli (með betri aðstöðu, betri þjálfun, meira fjármagn o.s.fr.) sem okkar kylfingar komast í því betri tækifæri fá þeir að ná stærsta markmiðinu að spila á meðal bestu kylfinga heims á sterkustu atvinnumannamótum heims.

Sterk staða á heimslista áhugamanna er líklega veigamesti þátturinn þegar okkar ungu kylfingar eru að koma sér á framfæri í háskólaferlinu. Þjálfarar í háskólunum eru fyrst og fremst að fylgjast með kylfingum á aldrinum 15-17 ára (18 ára í undantekningartilvikum og fyrir lakari skóla). Fyrir viðræður við sterkustu skólana er best að okkar kylfingar hámarki sína stöðu um 16 ára aldurinn (16-17) og fyrir lakari skóla er best að okkar kylfingar hámarka sína stöðu um 17 ára aldurinn (17-18). 

Til að komast inn á listann þurfa kylfingar að fá að lágmarki 6,5 stig fyrir árangur í móti. Kylfingarnir öðlast a.m.k. 6,5 stig fyrir sigur á veikum mótum (mót á Unglingamótaröðinni) eða með því að enda á meðal efstu 3 kylfinganna á GSÍ mótaröðinni (yfirleitt, fer eftir styrkleika mótsins).

Eftir að kylfingar eru komnir inn á listann er einungis gerð krafa um að kylfingar nái að lágmarki 4,0 stigum í 1 móti á hverju 12 mánaða tímabili. Kylfingar geta því lent í því að vera búnir að ná frábærum árangri yfir langan tíma en fá engin stig og eru ekki á listanum þar sem þeir hafa ekki náð þessum mikilvægu 6,5 stigum.

Það er því mjög mikilvægt að okkar bestu kylfingar á aldrinum 15-18 ára okkar fái sem flest tækifæri til að komast inn á listann (og safna stigum).