Þrír íslenskir kylfingar léku í dag á lokaúrtökumóti fyrir Opna breska áhugamannamótið. Það voru þeir Tómas Eiríksson Hjaltested, Dagbjartur Sigurbrandsson og Aron Emil Gunnarsson.

72 kylfingar léku um 23 laus sæti í mótinu, sem er eitt stærsta mót ársins fyrir áhugakylfinga. Leikið var á Royal Cinque Ports vellinum sem er staðsettur á austurströnd Bretlands.

Tómas Hjaltested fór fyrstur af stað í morgun og byrjaði sinn hring á fugli. Hann fylgdi því eftir með góðri spilamennsku á deginum og endaði á 70 höggum, tveimur undir pari. Tómas endaði jafn í 11. sæti og hefur því unnið sér inn þátttökurétt á Opna breska áhugamannamótinu sem hefst mánudaginn 16. júní.

Aron Emil fór næstur af stað. Hann komst inn í mótið af biðlista á lokadeginum, en var sem betur fer klár þegar kallið kom. Eftir tvo skolla og einn fugl á fyrstu þrettán holunum var ljóst að Aron þyrfti nokkra fugla á lokaholunum. Þeir duttu því miður ekki, lokaniðurstaðan 76 högg og 63. sæti mótsins.

Dagbjartur fór síðastur af stað. Hann opnaði hringinn á fugli, líkt og Tómas, og var kominn tvo undir par eftir sex holur. Eftir skolla á 15. holu var nokkuð ljóst að fugl þyrfti að detta á síðustu holunum til að Dagbjartur væri öruggur áfram. Þar sýndi hann stáltaugar, rúllaði þremur góðum púttum í og lék síðustu þrjár holurnar einn undir pari. Hann lauk því leik á 70. höggum og jafn í 11. sæti mótsins.

Opna breska áhugamannamótið hefst þann 16. júní, og verður leikið á Royal St. George’s og Royal Cinque Ports völlunum.

Sex íslenskir kylfingar verða nú á meðal þátttakenda í mótinu, en þeir Gunnlaugur Árni Sveinsson, Logi Sigurðsson, Veigar Heiðarsson og Guðjón Frans Halldórsson komust sjálfkrafa inn í mótið út frá stöðu sinni á heimslistanum.

Við munum fylgjast með mótinu og óskum þeim góðs gengis í næstu viku.