Golfklúbburinn Keilir heldur Hvaleyrarbikarinn 2025 dagana 30. maí til 1. júní. Mótið er þriðja mótið á GSÍ mótaröðinni á þessu tímabili.

Smelltu hér fyrir stöðu, rástíma og úrslit.

Eftir Vormótin tvö, sem voru leikin á Hlíðavelli og Þorláksvelli, er komið að hinum árlega Hvaleyrarbikar. Mótið er haldið á Hvaleyrarvelli Golfklúbbsins Keilis. Mikið er undir, en stigin í mótinu eru tvöföld á við Vormótin. Mótið gæti einnig reynst góður undirbúningur fyrir Íslandsmótið í höggleik þar sem leikið verður á sama velli.

Fyrirkomulag mótsins er 54 holu höggleikur. Eftir 36 holu leik skal leikmönnum fækkað þannig að þau 70% leikmanna sem eru með besta skor í hvorum flokki halda áfram keppni.

96 kylfingar taka þátt í mótinu, sem er hámarksfjöldinn. Þónokkrir kylfingar eru á biðlista og verða klárir til þátttöku ef einhver skyldi forfallast.

Keppendalistinn í bæði karla- og kvennaflokki er sá sterkasti á tímabilinu hingað til.

Í karlaflokki má finna atvinnukylfingana Harald Franklín Magnús og Guðmund Ágúst Kristjánsson, fyrrum Íslandsmeistarana Axel Bóasson og Kristján Þór Einarsson, ásamt efsta manni stigalistans Tómasi Eiríkssyni Hjaltested.

Í karlaflokki eru 72 keppendur. Lægsta forgjöfin er +6.1 en sú hæsta er 1.7. 22 kylfingar eru með +2 eða lægra í forgjöf og má því búast við alvöru skori í mótinu.

Í kvennaflokki mæta báði sigurvegarar Vormótanna, Berglind Erla Baldursdóttir og Heiðrún Anna Hlynsdóttir til leiks. Þar að auki bætast við margir kylfingar af Unglingamótaröðinni sem ekki tóku þátt í Vormótunum. Ragnhildur Sigurðardóttir, margfaldur Íslandsmeistari í golfi, er einnig á meðal keppenda.

Í kvennaflokki eru 24 keppendur. Lægsta forgjöfin er +2.4 og sú hæsta er 5.5. Lægstu fimm forgjafirnar í kvennaflokki eru allar 0.0 eða lægra, og má því búast við hörkukeppni um helgina.

Bikarinn hannaður í Japan

Keppt er um Hval­eyr­ar­bik­ar­ana eins og nafn mótsins gefur til kynna. Verðlauna­grip­ur­inn á sér nokkra sögu og óvenjulega. Er hann einn af elstu bik­ur­un­um í safn­inu hjá golf­klúbbn­um Keili. Var bik­ar­inn gef­inn af Toyota umboðinu árið 1979 eða tólf árum eft­ir að klúbbur­inn var stofnaður. Var keppt um bik­ar­inn á opnu móti hjá Keili sem haldið var í nokk­ur ár.

Bik­ar­inn er veg­leg­ur og frem­ur óvenju­leg­ur í út­liti. Var hann hannaður og sér­smíðaður í listagalle­rí í Jap­an á sín­um tíma. Þegar stiga­mót­inu Hval­eyr­ar­bik­arn­um var komið á fót árið 2016 þurfti að búa til annað ein­tak enda keppt í tveim­ur flokk­um í Hval­eyr­ar­bik­arn­um. Var bik­ar­inn send­ur til Kína með það fyr­ir aug­um að búa til eft­ir­lík­ingu en Kín­verj­arn­ir sem ætluðu að taka verkið að sér treystu sér ekki til þess þegar á hólm­inn var komið.

Höfðu Keil­is­menn þá upp á listagalle­rí­inu í Jap­an og var þar smíðaður ann­ar bik­ar sem gef­inn var af Icewe­ar. Þá þurfti raun­ar einnig að gera lít­il­lega við bik­ar­inn sem hafði skemmst á heim­leiðinni frá Jap­an. Bik­ar­inn hef­ur því farið nokkr­ar ferðir á milli Íslands og Asíu.

Mikilvæg stig á stigalista GSÍ

Hvaleyrarbikarinn er þriðja mót ársins á GSÍ mótaröðinni. Hér má sjá stöðu á stigalistum karla og kvenna.