Gunnlaugur Árni Sveinsson hafnaði í 13. sæti á sínu fyrsta háskólamóti á þessu ári sem lauk í dag á Sawgrass CC vellinum í Ponte Vedra Beach í Flórída. The Hayt háskólamótið er eitt allra sterkasta mót ársins þar sem mörg af sterkustu liðum bandaríska háskólagolfsins mættust.
Gunnlaugur Árni lék hringina þrjá á 67-74-69 höggum og var í heildina á sex höggum undir pari. Hann var í 2. sæti eftir fyrsta hring og var á tímabili í forystu á öðrum hring. Fyrir utan einn slæman fjögurra holu kafla á öðrum hring var spilamennskan frábær en það var aðeins einn kylfingur í mótinu sem fékk fleiri fugla en Gunnlaugur Árni.
Langbesti áhugakylfingur heims samkvæmt heimslista áhugakylfinga, Jackson Koivun, sigraði mótið á ellefu höggum undir pari og var fimm höggum á undan Gunnlaugi Árna. Þeir léku í sama ráshóp fyrstu tvo keppnisdagana en Jackson hefur nú unnið öll þrjú háskólamótin sín á þessu ári.
Skóli Gunnlaugs Árna, LSU, hafnaði í fjórða sæti í liðakeppninni. Auburn skólinn bar sigur úr býtum á 28 höggum undir pari og var fimm höggum á undan LSU.
Næsta mót Gunnlaugs Árna hefst eftir viku rétt hjá Los Angeles í Kaliforníu.
