Guðrún Brá Björgvinsdóttir, ríkjandi Íslandsmeistari og atvinnukylfingur úr Golfklúbbnum Keili, endaði jöfn í 35. sæti á Hills Open mótinu sem fram fór dagana 22.-24. ágúst.
Þetta er besti árangur hennar á LET mótaröðinni í sumar, en þetta er áttunda mót hennar á tímabilinu.
Leiknir voru þrír hringir á Hills Golf & Sports Club vellinum í Svíþjóð. Guðrún flaug í gegnum niðurskurðinn, og var fimm yfir pari eftir fyrstu tvo hringi sína.
Þriðja hringinn lék Guðrún á 72 höggum, einum yfir pari vallarins. Hún fékk fjóra fugla, þrjá skolla og einn tvöfaldan skolla á hringnum. Guðrún endaði mótið því sex yfir pari í heildina og nær sínum besta árangri á mótaröðinni í sumar.
Þetta er þriðji niðurskurðurinn í röð sem Guðrún nær á LET mótaröðinni, en hún hefur verið að leika flott golf undanfarið. Hún sat í 138. sæti stigalistans fyrir mót vikunnar en mun fara upp listann eftir þennan góða árangur.
Ragnhildur Kristinsdóttir og Andrea Bergsdóttir þreyttu frumraun sína á LET mótaröðinni um helgina en náðu ekki í gegnum niðurskurð.
