Golfsamband Íslands (GSÍ) og KPMG hafa unnið ítarlega greiningu á hagrænum áhrifum golfhreyfingarinnar á Íslandi. Niðurstöðurnar sýna skýrt að golfið er ekki aðeins vinsæl íþrótt heldur öflug fjöldahreyfing sem skapar umtalsverð verðmæti fyrir samfélagið.

Samkvæmt greiningunni nemur beint hagspor golfhreyfingarinnar tæpum 12 milljörðum króna á ári. Þar undir fellur starfsemi golfklúbba, sala á búnaði og þjónustu, æfingasvæði og golfhermar ásamt fjölbreyttri tengdri starfsemi.

Mikil fjölgun og breið þátttaka

Þátttaka í golfi hefur vaxið hratt á síðustu árum. Í skýrslunni kemur fram að um 30.000 kylfingar eru skráðir í golfklúbba og að fjöldinn hafi aukist um 11,5% milli ára. Þar að auki stunda þúsundir golf í hermum, á æfingasvæðum og púttvöllum sem hefur aukið aðgengi að íþróttinni.

Þessi þróun endurspeglast í auknum tekjum golfklúbba og vexti í tengdum greinum á borð við golfverslun og tæknilausna. Golfhermar og æfingaaðstaða eru orðnir mikilvægur hluti af heildarmyndinni og skapa tekjur allt árið um kring.

Kylfingur ver að jafnaði 560 þúsund krónum á ári í golf

Samkvæmt nýrri rannsókn á vegum The R&A eru heildarútgjöld íslenskra kylfinga að jafnaði 560.000 krónur á ári. Þar af fara um 90.000 kr. í beinan kostnað við að geta leikið golf (grunnþætti), um 140.000 kr. í félagsgjöld, en stærsti hlutinn eða um 330.000 krónur í aukakostnað á borð við búnað, fatnað og golfferðir. 

Golfferðamennska styrkir hagkerfið

Golf hefur einnig orðið sífellt mikilvægari þáttur í ferðaþjónustu. Greiningin sýnir að ferðamennska tengd golfi veltir um 800 milljónum króna á ári og að 15.000 gistinætur séu seldar árlega beinlínis vegna golfleiks. Erlendir kylfingar skila golfklúbbum um 155 milljónum króna á ári og eyða að jafnaði um 60% meira en almennir ferðamenn.

Þá fara um 8.000 íslenskir kylfingar í golfferðir árlega sem skilar íslenskum ferðaskrifstofum tekjum á bilinu 2,5–2,8 milljarða króna.

Horft til framtíðar

Niðurstöðurnar undirstrika að „golfáhrifin“ ná langt út fyrir golfvöllinn. Þau birtast í atvinnusköpun, gjaldeyristekjum og öflugri ferðaþjónustu. Samkvæmt meðalspá er gert ráð fyrir að um 40.000 kylfingar verði skráðir í golfklúbba árið 2030. Sú þróun undirstrikar að íþróttin er í sókn og að mikilvægt er að huga að áframhaldandi fjárfestingum og stuðningi við hreyfinguna til framtíðar.

Í umsögn um greininguna segir Willum Þór Þórsson, forseti ÍSÍ:

„Forvarnar- og lýðheilsugildi íþrótta er óumdeilt og hefur verið staðfest með rannsóknum, og því er mikilvægt að styðja við íþróttastarf á tímum vaxandi heilsufarslegra áskorana í velferðarsamfélaginu. Á sama tíma hefur reynst æ erfiðara að manna og fjármagna starf sem lengi hefur byggt á sjálfboðaliðum. Þess vegna er kortlagning á hagrænum, beinum og óbeinum áhrifum íþrótta orðin brýn til að sýna hversu víðtæk og mikil áhrif íþróttahreyfingarinnar eru á efnahag og velferð þjóðarinnar.

Greining golfhreyfingarinnar dregur þetta skýrt fram; áhrifin ná langt út fyrir völlinn og birtast í verðmætasköpun og atvinnu um land allt.“

👉 Nánar má lesa um niðurstöður greiningarinnar á vef KPMG