Stór hópur íslenskra afrekskylfinga er á meðal keppenda á Sand Valley Masters mótinu sem fer fram í Póllandi dagana 13.-15. apríl. Mótið er hluti af Nordic Golf League mótaröðinni sem er sú þriðja sterkasta í Evrópu og er þetta annað mót hópsins í landinu. Íslensku kylfingarnir eru:

• Aron Snær Júlíusson, GKG
• Dagbjartur Sigurbrandsson, GR
• Daníel Ísak Steinarsson, GK
• Hlynur Bergsson, GKG
• Logi Sigurðsson, GS
• Sigurður Arnar Garðarsson, GKG
• Skúli Gunnar Ágústsson, GKG

Leikið er á ný á Sand Valley Golf Resort svæðinu í norðurhluta Póllands, en þó á öðrum velli en í síðustu viku. Í fyrra móti hópsins voru þeir Logi Sigurðsson og Sigurður Arnar þeir einu sem komust í gegnum niðurskurð. Báðir léku þeir gott golf í mótinu og enduðu jafnir í áttunda sætinu.

Daníel Ísak lék best allra íslensku kylfinganna í dag og kom í hús á 67 höggum, þremur höggum undir pari. Daníel fékk fjóra fugla og einn skolla á hringnum, en hann er jafn í 10. sæti mótsins.

Hlynur Bergsson er höggi á eftir Daníel og kom í hús á 68 höggum. Hann fékk fimm fugla, þrjá skolla og er jafn í 17. sætinu.

Dagbjartur lék hringinn einnig undir pari og lauk leik á 69 höggum. Íslandsmeistarinn er jafn í 33. sæti mótsins, en efstu 50 kylfingarnir ná í gegnum niðurskurð eftir hring morgundagsins.

Stöðu allra íslensku kylfinganna má sjá hér að neðan.

Hér má fylgjast með stöðu mótsins

Efstu fimm kylfingar stigalistans í lok tímabils vinna sér inn fullan þátttökurétt á HotelPlanner Tour mótaröðinni, sem er sú næststerkasta í Evrópu. Einnig er hægt að vinna sér inn þátttökurétt með því að vinna þrjú mót á sama tímabilinu. Haraldur Franklín Magnús leikur á HotelPlanner Tour, en sú mótaröð hefst aftur í maí.