Dagbjartur Sigurbrandsson, Sigurður Arnar Garðarsson og Ragnar Már Garðarsson hefja í dag keppni á öðru stigi úrtökumóta fyrir DP World Tour, sterkustu atvinnumótaröð Evrópu. Mótin fara fram á Spáni dagana 29. október til 1. nóvember.
Íslensku kylfingarnir þrír tryggðu sér sæti á öðru stiginu með góðum árangri á fyrsta stigi úrtökumótanna, sem fram fór á Golf-und Country Club Seddiner See í Þýskalandi í september. Þar voru alls átta íslenskir kylfingar meðal keppenda en Dagbjartur og bræðurnir Sigurður Arnar og Ragnar Már voru þeir einu sem komust áfram.
Dagbjartur náði bestum árangri Íslendinganna í Þýskalandi og lauk keppni jafn í sjötta sæti á níu höggum undir pari. Hann lék hringina fjóra á 71, 69, 70 og 69 höggum. Sigurður Arnar hafnaði jafn í ellefta sæti á sex höggum undir pari og Ragnar Már varð jafn í fjórtánda sæti á fimm höggum undir pari. Alls tryggðu 19 kylfingar sér áframhaldandi þátttökurétt úr mótinu.
Á öðru stigi úrtökumótanna eru fjögur mót leikin samtímis á Spáni, á völlunum Desert Springs Resort í Almería, Golf Las Pinaillas í Albacete, Fontanals Golf Club í Girona og Isla Canela Links í Huelva. Leikinn er 72 holu höggleikur á fjórum keppnisdögum og keppa kylfingarnir um sæti á lokaúrtökumótinu.
Lokaúrtökumótið fer fram dagana 6.-11. nóvember á INFINITUM-golfsvæðinu á Spáni. Þar verða leiknir sex hringir og munu 15 efstu kylfingarnir tryggja sér keppnisrétt á DP World Tour og fullan keppnisrétt á HotelPlanner Tour fyrir tímabilið 2027. Aðrir kylfingar sem komast á lokaúrtökumótið geta jafnframt unnið sér mismunandi keppnisrétt á HotelPlanner Tour eftir lokastöðu sinni.
Dagbjartur kemur til leiks eftir sitt fyrsta heila tímabil á Nordic Golf League, þar sem hann endaði í 25. sæti stigalistans. Hann náði sex sinnum að enda meðal tíu efstu á tímabilinu og endaði í 12. sæti á lokamóti mótaraðarinnar í Danmörku fyrr í mánuðinum.
Dagbjartur og Ragnar Már leika báðir á Isla Canela Links við Huelva, en Sigurður Arnar keppir á Fontanals Golf Club í Girona.
Hér má fylgjast með stöðu íslensku kylfinganna:
Dagbjartur Sigurbrandsson og Ragnar Már Garðarsson – Isla Canela Links
