Ólafur Björn Loftsson, afreksstjóri Golfsambands Íslands, valdi á dögunum 27 leikmenn í landsliðshóp GSÍ. Hópurinn kom saman í fyrstu æfingabúðir vetrarins dagana 21.-23. nóvember. 

“Landsliðskylfingar voru vel stemmdir á fyrstu landsliðshelgi vetrarins og það ríkir mikil eftirvænting eftir spennandi og fjölbreyttum verkefnum næstu mánuði. Það er mikill meðbyr í íslensku afreksgolfi um þessar mundir þar sem stuðningur til afrekskylfinga heldur áfram að aukast og okkar fremstu kylfingar eru að ná eftirtektarverðum árangri.”

Fyrsta verkefni hópsins í æfingabúðunum fór fram í Háskólanum í Reykjavík á föstudeginum þar sem Ólafur Björn fór yfir kynningu á starfseminni fyrir kylfinga, foreldra þeirra og þjálfurum. 

Á laugardeginum æfði hópurinn á golfhermastaðnum Nítjánda við Bíldshöfða þar sem Örninn Golfverslun var áður til húsa. Landsliðskylfingarnir höfðu þar til afnota átta Trackman golfherma með nýjustu tækni og nýttu einnig tækifærið og spreyttu sér í pílu í hádegishlénu. Laugardagskvöldið fór svo fram æfing í knattspyrnuhúsinu Fellinu í Mosfellsbæ. Á sunnudeginum æfði hópurinn í aðstöðu Keilis í Hraunkoti þar sem Steinn Baugur Gunnarsson, Guðmundur Örn Árnason og Baldur Gunnbjörnsson sáu meðal annars um líkamsmælingar landsliðskylfinga. 

Í byrjun janúar á næsta ári fer landsliðshópurinn í æfingaferð til Spánar á La Finca golfsvæðið í Alicante annað árið í röð og hópurinn fer síðan í tvær keppnisferðir til Portúgal í febrúar og mars. 

“Æfingaferðin heppnaðist mjög vel á þessu ári og við vorum mjög ánægð með allt svæðið. Þessi ferð er ein sú mikilvægasta á árinu fyrir okkar afrekskylfinga og þjálfara. Það eru forréttindi að geta æft á svona flottum golfvelli og styrkt tengslin á milli okkar allra. Einnig er mjög ánægjulegt að allur hópurinn sé að fara að keppa í fjórum alþjóðlegum mótum í vetur í Portúgal. Við erum afar þakklát að geta boðið okkar afrekskylfingum upp á þetta tækifæri og hlökkum mikið til.”

Landsliðshópurinn er þannig skipaður: