Íslenski landsliðskylfingurinn Gunnlaugur Árni Sveinsson endaði annar í Jackson T. Stephens Cup sem fram fór í Illinois í gær. Í mótið, sem sýnt var á Golf Channel, mættu sex af sterkari skólum háskólagolfsins.
Smelltu hér til að sjá úrslit mótsins:
Gunnlaugur lék hringina þrjá á 72-64-69 og lauk leik á fimm höggum undir pari í heildina, tveimur höggum á eftir William Sides úr SMU. Einungis einn kylfingur tapaði færri höggum en okkar maður í mótinu. Eftir þrjá skolla á fyrstu tíu holum fyrsta hrings setti Gunnlaugur í næsta gír og tapaði einu höggi á síðustu 44 holum mótsins.
Á öðrum keppnisdegi lék Gunnlaugur á 64 höggum, sex undir pari, sem reyndist besti hringur dagsins og var jafn sem besti hringur mótsins. Þar fékk hann sex fugla og tapaði ekki höggi.
Skóli Gunnlaugs, LSU, lék best í liðakeppninni, þar sem bestu samanlögðu skor liðsins telja á hverjum degi.
Smelltu hér fyrir stöðuna í liðakeppninni:
Í dag mætast efstu tvö lið höggleiksins, LSU og North Carolina, í úrslitaleik mótsins. Þar leika allir leikmenn liðanna tvímenning þar sem fimm stig og sigur í mótinu er undir.
Gunnlaugur mætir hinum Bandaríska Keaton Vo, sem lék best allra úr North Carolina skólanum. Keaton endaði höggleikinn jafn í 3. sæti á fjórum undir pari, svo búast má við spennandi einvígi í kvöld.
Hægt verður að fylgjast með úrslitaleiknum í kvöld á Golf Channel.
Tímabilið fer vel af stað hjá Gunnlaugi Árna, sem situr í 14. sætinu á heimslista áhugamanna. Með árangri helgarinnar þykir þó líklegt að hann stökkvi upp í 11. eða 12. sætið, sem væri hans besta staða á listanum til þessa.
