Mikill áhugi var á Íslandsmótinu í golfi 2025 sem fram fór á Hvaleyrarvelli dagana 7.-10. ágúst. Þetta kemur fram í gögnum frá RÚV.

Bein útsending var frá síðustu þremur keppnisdögum mótsins, og varði útsending í 3-4klst. í senn.

Uppsafnað áhorf var 14.5%, en alls horfðu tæplega 40 þúsund manns á útsendingar frá Íslandsmótinu í golfi frá föstudegi til sunnudags.

Mest var áhorfið á síðustu holum mótsins, en þá voru um 20 þúsund áhorfendur með stillt á RÚV.

Fleiri karlar horfðu á útsendinguna í ár eða 18,3% á móti 10,6% kvenna.

Stórt stökk var á áhorfi mótsins í samanburði við síðustu ár, en tæplega 40% aukning var á uppsöfnuðu áhorfi milli ára. Þá var mótið í ár með mesta áhorf Íslandsmóta síðustu fimm ára, og þjónar sem hvatning til að bjóða upp á enn betri útsendingu að ári.

Áhuginn á mótinu í ár er í samræmi við glæsilegt mót Golfklúbbsins Keilis, afbragðsgóða útsendingu RÚV og undirbúningsvinnu Golfsambands Íslands. Fyrst og fremst voru það þó keppendur mótsins sem buðu upp á frábært sjónvarpsefni og héldu mikilli spennu allt til enda.

Íslandsmótið í golfi 2026 fer fram á Korpúlfsstaðavelli Golfklúbbs Reykjavíkur – sjáumst þar!