Guðrún Brá Björgvinsdóttir, atvinnukylfingur úr Keili Hafnarfirði, leikur á tveimur mótum á LET Evrópumótaröðinni í Sádí-Arabíu á næstu tveimur vikum. Fyrra mótið hefst þann 4. nóvember en leikið er á Royal Greens Golf & Country Club.
Mótið sem fer fram í þessari viku er 14. mótið hjá Guðrúnu Brá á þessu tímabili á sterkustu atvinnumótaröð Evrópu í kvennaflokki.
Hún er í 78. sæti á stigalista LET Evrópumótaraðarinnar fyrir þetta mót. Besti árangur hennar á tímabilinu er 12. sæti.
Guðrún Brá tók þátt á þessu móti í fyrra í Sádí Arabíu. Hún lék þá á 80-76 höggum og komst ekki í gegnum niðurskurðinn.
Til samanburðar þá endaði Guðrún Brá í 127. sæti á stigalista LET Evrópumótaraðarinnar í fyrra.
