Það er mat fagmanna og sérfræðinga sem sjá um umhirðu golfvalla landsins að vellirnir komi afar vel undan vetri. Það ríkir því mikil tilhlökkun hjá keppendum fyrir þriðja mót keppnistímabilsins á Eimskipsmótaröðinni 2016-2017. Egils–Gullmótið fer fram á Hólmsvelli í Leiru 19.-21. maí. Tímabilið 2016-2017 er fyrsta tímabilið í sögu Eimskipsmótaraðarinnar þar sem keppni á nýju tímabili hófst að hausti til.
Skráning í Egils-Gull mótið stendur yfir og hafa margir þekktir kylfingar skráð sig til leiks. Þar má nefna að Valdís Þóra Jónsdóttir, atvinnukylfingur úr Leyni á Akranesi, er skráð til leiks. Valdís Þóra er tvöfaldur Íslandsmeistari í golfi og er ein þriggja íslenskra kvenna sem hafa komist inn á sterkustu atvinnumótaröð í Evrópu, LET.
Valdís Þóra hefur náð góðum árangri á undanförnum mánuðum á LET Evrópumótaröðinni og LET Access mótaröðinni – og verður spennandi að fylgjast með henni á Hólmsvelli í Leiru.
Veðurspáin fyrir næstu helgi er ljómandi góð samkvæmt yr.no.
Eins og áður segir stendur skráning í Egils-Gullmótið enn yfir.
Þátttakendur skulu skrá sig í mótið á golf.is fyrir klukkan 23:59 þriðjudaginn 15. maí. Greiða verður þátttökugjaldið með greiðslukorti við skráningu.
Fyrsta mót ársins á Eimskipsmótaröðinni, mótaröð bestu kylfinga landsins, er jafnframt þriðja mótið á keppnistímabilinu 2016-2017. Tvö fyrstu mót tímabilsins fóru fram s.l. haust í Nýherjamótið í Vestmanneyjum og Honda–Classic á Akranesi.
Alls eru átta mót á hverju tímabili á Eimskipsmótaröðinni. Það eru sex mót eftir á þessu tímabili en tvö mót í september á þessu ári marka upphafið á nýju tímabili 2017-2018.
Axel Bóasson úr GK og Ragnhildur Kristinsdóttir GR stóðu uppi sem stigameistarar á síðasta tímbili á Eimskipsmótaröðinni. Þetta var annað árið í röð sem Axel er stigameistari en hann fagnaði sínum fyrsta stigameistaratitli haustið 2016. Ragnhildur varð stigameistari í fyrsta sinn í fyrra.